தார்ச்சாலை பிட்சில் பட்லர் புரட்டி எடுக்க செஹல் ஹாட்ரிக்கில் ராஜஸ்தான் த்ரில் வெற்றி

பிரபர்ன் ஸ்டேடியத்தில் நேற்று நடைபெற்ற ஐபிஎல் 30-வது போட்டியில் ராஜஸ்தான் ராயல்ஸ் அணி பட்லரின் சதம் சஞ்சு சாம்சனின் சிறு அதிரடியில் 217 ரன்களைக் குவிக்க தொடர்ந்து ஆடிய கொல்கத்தா நைட் ரைடர்ஸ் அணி ஏரோன் பிஞ்ச் (58 ரன் 28 பந்து 9 பவுண்டரி 2 சிக்ஸ்) , ஷ்ரேயஸ் அய்யர் (85, 51 பந்து 7 பவுண்டரி 4 சிக்ஸ்) அதிரடியில் 210 வரை வந்து தோல்வி அடைந்தது. ராஜஸ்தான் அணியில் லெக்ஸ்பின்னர் செஹல் 4 ஓவர் 40 ரன்கள் கொடுத்தாலும் முக்கியமான ஹாட்ரிக்குடன் 5 விக்கெட்டுகளைக் கைப்பற்றினார்.

ஐபிஎல் கிளாசிக் என்று வர்ணிக்கப்படும் இந்தப் போட்டி போன்று பிட்சைப் போட்டால் பவுலர்கள் கை கால் உடைந்து வீடு போய்ச் சேர வேண்டியதுதான். ஆனால் இந்த சாத்துமுறையிலும் குறைந்த சிக்கன விகிதம் காட்டியவர் சுனில் நரைன் இவர் 4 ஓவர் 21 ரன்கள் கொடுத்தார் ஆனால் விக்கெட் இல்லை. இது மிகப்பெரிய விஷயம். இவருக்கு அடுத்த சிக்கன விகிதமே ஓவருக்கு 8.50. அது ஷிவம் மாவி. என்றால் பிட்சின் தன்மையை பார்த்துக் கொள்ளலாம். கமின்ஸ், பிரசித் கிருஷ்ணா, உமேஷ் யாதவ் என்று பெரிய பெரிய ஆபீசர்களெல்லாம் அடி வாங்கிக் கொண்டு சென்றனர்.

டாஸ் வென்ற கொல்கத்தா அணியின் கேப்டன் ஷ்ரேயஸ் அய்யர் பந்துவீச்சை தேர்வு செய்தார். அதன்படி ராஜஸ்தான் அணி முதலில் பேட்டிங் செய்ய களமிறங்கியது.

தொடக்க வீரர்களாக ஜாஸ் பட்லர் - தேவ்தத் படிக்கல் களமிறங்கினர். ஏற்கனவே இந்த தொடரில் அதிக ரன் அடித்தவர்கள் பட்டியலில் முன்னணி வகிக்கும் பட்லர் இந்த போட்டியிலும் வந்த வேகத்தில் பவுண்டரிகளாக விளாசினார்.

அதிரடியாக விளையாடிய அவர் 29 பந்துகளில் அரைசதம் அடித்து அசத்தினார். மறுமுனையில் விளையாடி வந்த தேவ்தத் படிக்கல் 17 பந்துகளில் 23 ரன்கள் அடித்து நரேன் பந்துவீச்சில் வெளியேறினார்.

இதை தொடர்ந்து சாம்சன் களமிறங்கினர். பட்லர் உடன் இணைந்து இவரும் பவுண்டரிகளாக அடித்தார். 19 பந்துகளில் 38 ரன்கள் குவித்து சாம்சன் ஆட்டமிழந்தார். தொடர்ந்து அசத்திய பட்லர் 59 பந்துகளில் சதம் அடித்தார். இதன்மூலம் அவர் நடப்பு ஐபிஎல் தொடரில் 2-வது சதத்தை பூர்த்தி செய்தார். 61 பந்துகளில் 103 குவித்து அவர் கம்மின்ஸ் பந்துவீச்சில் வெளியேறினார்.

இறுதியில் 20 ஓவர்கள் முடிவில் ராஜஸ்தான் அணி 5 விக்கெட் இழப்பிற்கு 217 ரன்கள் குவித்துள்ளது. 218 ரன்கள் எடுத்தால் வெற்றி என்ற இலக்குடன் கொல்கத்தா அணி களமிறங்கியது.

தொடக்க வீரராக களமிறங்கிய நரேன் ரன் ஏதும் எடுக்காமல் ரன் அவுட்டாகினார். மற்றொரு தொடக்க வீரருடன் பின்ச் உடன் ஜோடி சேர்ந்த அணியின் கேப்டன் ஷ்ரேயஸ் அய்யர் கொல்கத்தா அணியின் ஸ்கோரை மளமளவென உயர்த்தினர்.

அதிரடியாக விளையாடிய இருவரும் அரைசதம் கடந்து அசத்தினர். ஆரோன் பின்ச் 58 ரன்கள் குவித்த நிலையில் பிரசித் கிருஷ்ணா பந்துவீச்சில் வெளியேறினார்.

ஷ்ரேயஸ் அய்யர் தனது அதிரடியை தொடர நிதிஷ் ராணா 18 ரன்களில் வெளியேறினார். அவரை தொடர்ந்து வந்த ரசல் தனது முதல் பந்திலே அஸ்வின் சுழலில் போல்டானார்.

ஒரு முனையில் விக்கெட்கள் சரிந்தாலும் ஷ்ரேயஸ் அய்யர் சிக்சர் பவுண்டரிகள் அடிப்பதை நிறுத்தவில்லை. பின்னர் 17-வது ஓவரை வீசிய யுஸ்வேந்திர சஹால் ஒரே ஓவரில் ஷ்ரேயஸ் அய்யர் (85 ரன்கள்), கம்மின்ஸ் , மாவி விக்கெட்களை (ஹாட்ரிக்) வீழ்த்தி போட்டியை ராஜஸ்தான் பக்கம் திருப்பினார்.

இறுதி ஓவரில் வெற்றிக்கு 11 ரன்கள் தேவைப்பட்ட நிலையில் 3 ரன்கள் மட்டுமே அடித்தநிலையில் கொல்கத்தா அணி அனைத்து விக்கெட்களையும் இழந்தது. இதனால் ராஜஸ்தான் அணி 7 ரன்கள் வித்தியாசத்தில் திரில் வெற்றி பெற்றது.