ஐ.பி.எல் 2021 | கழற்றி விடப்பட்ட ஆஸ்திரேலிய வீரர்களுக்கு வலை விரிக்கும் சி.எஸ்.கே

ஐ.பி.எல் 2020 தொடரில் சி.எஸ்.கே அணி முதன்முறையாக ஃப்ளே ஆப் சுற்றுக்கு கூட முன்னேறாமல் லீக் போட்டிகளுடன் வெளியேறியது.

இதனால் கேப்டன் தோனி மீதும் சி.எஸ்.கே அணி மீதும் கடும் விமர்சனம் எழுந்தது. இதையடுத்து வரும் ஐ.பி.எல் தொடரில் சி.எஸ்.கே அணியை வலுப்படுத்த நிர்வாகம் முடிவெடுத்துள்ளது.

பிப்ரவரி 11-ம் ஐ.பி.எல் 2021 தொடருக்கான மினி ஏலம் நடைபெற உள்ளது. இந்த ஏலத்தில் ஒரு வெளிநாட்டு வீரரை மட்டுமே சி.எஸ்.கே ஏலத்தில் எடுக்க முடியும்.

பஞ்சாப் அணியிலிருந்து வெளியேற்றப்பட்ட கிளன் மேக்ஸ்வெல் மற்றும் ராஜஸ்தான் அணியிலிருந்து வெளியேற்றப்பட்ட ஸ்டீவன் ஸ்மித் என இருவரில் ஒருவரை ஏலத்தில் எடுக்க திட்டமிட்டுள்ளது.

சென்னை அணியிலிருந்து கேதர் ஜாதவ், வாட்சன், பியூஷ் சாவ்லா, முரளி விஜய், மோனு சிங், ஹர்பஜன் சிங் ஆகியோர் வெளியேற்றப்பட்டுள்ளனர்.

இதனால் சென்னை அணிக்கு ரூ.22.9 கோடி கைவசம் உள்ளது. மேலும் வெளியேற்றப்பட்ட வீரர்களுக்கு பதிலாக 7 உள்நாட்டு வீரர்கள் மற்றும் ஒரு வெளிநாட்டு வீரரை ஏலத்தில் எடுக்க வேண்டும்.

மேக்ஸ்வெல், ஸ்டீவன் ஸ்மித் தவிர இங்கிலாந்து ஹிட்டர் டேவிட் மாலனும் சி.எஸ்.கே மினி ஏலம் பட்டியலில் இருப்பதாக தகவல் வெளியாகி உள்ளன.