IPL 2020 | நேர மாற்றம்... முதன் முறையாக வார நாட்களில் இறுதிப்போட்டி... - முக்கிய அம்சங்கள் என்ன?

பி.சி.சி.ஐ தலைவர் கங்குலி தலைமையில் வீடியோ கான்ஃபிரன்ஸ் மூலம் நடைபெற்ற நேற்று கூட்டத்தில் ஐ.பி.எல் தொடரின் போட்டி அட்டவணை, பயண திட்டம், பாதுகாப்பு நடவடிக்கை, அரசின் அனுமதி என பல்வேறு முக்கிய விவகாரங்கள் ஆலோசிக்கப்பட்டு, பின்னர் முடிவடுக்கப்பட்டன.

ஐபிஎல் தொடரின் இறுதிப்போட்டி நவம்பர் 10-ல் நடக்க இருக்கிறது. முதன்முறையாக வார நாட்களில் இறுதிப்போட்டி நடத்தப்பட உள்ளது.

மொத்தமாக 53 நாட்கள் நடைபெறும் இந்த தொடரில், 10 நாட்களில் இரண்டு போட்டிகள் நடத்த திட்டமிடப்பட்டுள்ளது.

இந்தியாவில் வழக்கமாக 8 மணிக்கு போட்டிகள் தொடங்கும் நிலையில், இம்முறை, 30 நிமிடத்திற்கு முன்பாகவே இந்திய நேரப்படி இரவு 7.30 மணிக்கு போட்டி தொடங்கப்படும் எனவும் தெரிவிக்கப்பட்டுள்ளது.

ஐக்கிய அரபு அமீரகத்தில் கொரோனா தொற்று பாதிப்பு அதிகளவில் இல்லாததால், ஐ.பி.எல் தொடருக்கும் 50 சதவிகித ரசிகர்கள் அனுமதிக்கப்படுவர் என ஐக்கிய அரபு அமீரகம் தரப்பில் தெரிவிக்கப்பட்டுள்ளது. 

பிசிசிஐ தரப்பில் வீரர்களின் பாதுகாப்பை கருத்தில் கொண்டு ரசிகர்கள் இல்லாமல் போட்டி அரங்கேற வேண்டுகோள் விடுக்கப்பட்டுள்ளது.

போட்டிக்கான தேதிகள் அறிவிக்கப்ப்பட்டதையடுத்து, அணியில் உள்ள வீரர்கள் மற்றும் அதிகாரப்பூர்வ அதிகாரிகளுக்கு விசா விண்ணப்பிக்கும் பணியை அணியின் உரிமையாளர்கள் தொடங்கவிருப்பதாக உரிமையாளர்கள் தரப்பில் தெரிவிக்கப்பட்டுள்ளது.

மகளிருக்கான ஐ.பி.எல். போட்டிகள் நடத்தவும் முடிவு எடுக்கப்பட்டுள்ளது. 

கடந்த சீசனில் இருந்த அனைத்து ஸ்பான்ஸர் நிறுவனங்களும் இம்முறை தொடரும் என்றும் அறிவிக்கப்பட்டுள்ளது

டைட்டில் ஸ்பான்ஸராக உள்ள சீன நிறுவனமான விவோ உள்ளிட்ட அனைத்து சீன ஸ்பான்ஸர் நிறுவனங்கள் உடனான ஒப்பந்தம் இம்முறையும் தொடரும்

சீன நிறுவனங்கள் மீது இந்திய அரசு கடும் நடவடிக்கை எடுத்துவரும் நிலையில், ஐபிஎல் நிர்வாகத்தின் இந்த முடிவு சர்ச்சையை ஏற்படுத்தியுள்ளது