சேப்பாக்கத்தில் இதுதான் உங்கள் கடைசி போட்டியா...? தோனி கொடுத்த மாஸ் ரிப்ளை...!

ஐபிஎல் கிரிக்கெட் தொடரின் முதலாவது தகுதிச்சுற்றுப் போட்டியில், நடப்புச் சாம்பியனான குஜராத் டைட்டன்ஸ் அணிக்கு எதிரான போட்டியில், சூப்பர் கிங்ஸ் அணி 15 ரன்கள் வித்தியாசத்தில் அசத்தல் வெற்றி பெற்றது. அணி வெற்றி பெற்றதும், நிகழ்த்தப்பட்ட வாண வேடிக்கையால் சேப்பாக்கம் பகுதியே ஜொலித்தது. அத்துடன், ரசிகர்கள் எழுப்பிய ஆரவாரத்தால் மைதானமே அதிர்ந்தது.

ஐ.பி.எல். இறுதிப் போட்டிக்கு முன்னேறியுள்ள சென்னை அணி, ஐந்தாவது முறையாக மகுடம் சூடும் என ரசிகர்கள் நம்பிக்கை தெரிவித்துள்ளனர்.

இதனிடையே, தகுதிச் சுற்று போட்டிக்குப் பின் இது தான் சேப்பாக்கத்தில் உங்களின் கடைசி போட்டியா என்று தோனியிடம் வர்ணனையாளர் கேள்வி எழுப்பினார்.

அதற்கு பதிலளித்த தோனி, இன்னும் 8, 9 மாதங்களுக்குப் பிறகு முடிவெடுக்க வேண்டிய விஷயத்தை, இப்போதே தலையில் ஏற்றிக்கொள்ள விரும்பவில்லை என்றார். மேலும், தான் களத்தில் சி.எஸ்.கே. வீரராக இருப்பேன் அல்லது களத்திற்கு வெளியே வேறொரு பொறுப்பில் இருப்பேன் என கூறினார்.

அத்துடன், எப்போதும் சிஎஸ்கே அணியில் ஓர் அங்கமாகவே இருப்பேன் எனவும் உறுதிபட தோனி தெரிவித்தார். இதனால், சென்னை சூப்பர் கிங்ஸ் ரசிகர்கள் உற்சாகமடைந்துள்ளனர்.