முதலிடத்தை இழந்த விராட் கோலி... டாப் 10-ல் இடம்பெறாத பும்ரா... ஐசிசி ரேங்கிங்கில் அதிரடி மாற்றம்

நியூசிலாந்து அணிக்கு எதிரான முதல் டெஸ்ட் போட்டியில் இந்திய வீரர்கள் மோசமாக விளையாடியதால் ஐசிசி டெஸ்ட் தரவரிசையில் பின்னடைவை சந்தித்து உள்ளனர்.

சர்வதேச டெஸ்ட் வீரர்களின் தரவரிசைப் பட்டியலை ஐசிசி வெளியிட்டுள்ளது. நியூசிலாந்திற்கு எதிரான முதல் டெஸ்ட் போட்டியில் இந்திய அணியின் கேப்டன் விராட் கோலி முதல் இன்னிங்சில் 1 ரன்னிலும் 2வது இன்னிங்சில் 19 ரன்கள் எடுத்து மோசமான ஆட்டத்தை வெளிப்படுத்தினார்.

இதனால் 5 புள்ளிகளை இழந்து  911 புள்ளிகளிலிருந்து 906 புள்ளிகளுக்கு சரிவடைந்தார்.  911 புள்ளிகளுடன் ஸ்டீவன் ஸ்மித் முதல் இடத்தை தட்டிப்பறித்தார். நீண்ட நாட்களாக தொடர்ந்து முதல் இடத்தில் இருந்த விராட் கோலி இரண்டாவது இடத்திற்கு தள்ளப்பட்டார்.

பந்தை சேதப்படுத்திய விவகாரத்திற்கான ஒரு ஆண்டு தடைகாலம் முடிந்து மீண்டும் பேட்டிங்கில் அசத்தி வரும் ஆஸ்திரேலிய ரன் மிசின் ஸ்டீவன் ஸ்மித் முதல் இடத்தைக் கைப்பற்றி தனது பலத்தை நிரூபித்துள்ளார். முதல் பத்து இடங்களில் இந்திய வீரர்கள் ரஹானே, புஜாரா, மயங்க் அகர்வால் ஆகியோர் முறையே 8, 9, 10 இடங்களை பிடித்துள்ளனர்.

இதேபோல் பந்துவீச்சு தரவரிசைப் பட்டியலில் முதல் பத்து இடங்களுக்குள் ஒரே ஒரு இந்திய வீரர் மட்டும் தான் இடம்பிடித்துள்ளார். அஸ்வின் 765 புள்ளிகளுடன் 9 இடத்தை பிடித்துள்ளார். ஆஸ்திரேலிய வீரர் பேட் கம்மின்ஸ் 904 புள்ளிகளுடன் முதல் இடத்தில் நீடிக்கிறார். இந்திய அணியின் நட்சத்திர பந்துவீச்சாளர் பும்ரா 756 புள்ளிகளுடன் 11வது இடத்தில் உள்ளார்.