கோலி மிகவும் நம்பும் பவுலர்: ரைசிங் ஸ்டார் இவர்தான் என்கிறார் வெட்டோரி

ஒரு வேகப்பந்து வீச்சாளரிடம் ஒரு கேப்டன் என்ன எதிர்பார்க்கிறாரோ அதை அப்படியே கச்சிதமாக கொடுக்கும் ஒரே பவுலர் இந்தக் காலக்கட்டத்தில் முகமது சிராஜ்தான், அவர்தான் ரைசிங் ஸ்டார் அதாவது இந்திய அணியின் வளர்ந்து வரும் நட்சத்திரம் என்கிறார் நியூசிலாந்து முன்னாள் கேப்டன் டேனியல் வெட்டோரி.

ஆஸ்திரேலியா தொடரில் முகமது சிராஜ் அறிமுகமானார். அங்கு கலக்கு கலக்கென்று கலக்கினார், தன் தந்தையை இழந்த துக்கத்தை மறைத்து மறந்து ஒரு வீரனாக எழுச்சி பெற்றார்.

ஆனாலும் இப்போது தண்டமாகிவிட்ட பவுலர் இஷாந்த் சர்மாவுக்கு வாய்ப்பை கொடுத்து விட்டுத்தான் சிராஜை அணியில் எடுக்கின்றனர். கான்பூர் டெஸ்ட் போட்டியில் இவர் இருந்திருந்தால் அந்த கடைசி விக்கெட்டை விழித்தியிருப்பார் இந்தியாவும் தொடரை 2-0 என்று வெற்றி பெற்று ஐசிசி உலக டெஸ்ட் சாம்பியன்ஷிப்பில் 24 புள்ளிகளை கூடுதலாகப் பெற்றிருக்கும்.

ஆனால் கோலி வந்தார், சிராஜை உடனே அணியில் எடுத்தார், அவரும் அன்று மும்பையில் இந்திய அணி மயங்க் அகர்வலின் அபாரமான 150 ரன்களுடன் 321 ரன்கள் எடுத்த பிறகு, ஒரு ஸ்பெல் வேகப்பந்து வீச்சு வீசினாரே பார்க்கலாம் நியூசிலாந்தின் டாப் ஆர்டரை வீட்டுக்கு அனுப்பினார்.

அதுவும் ராஸ் டெய்லருக்கு வீசிய அந்தப் பந்து அற்புதத்திலும் அற்புதம். அந்த 3 விக்கெட்டுகள்தான் நியூசிலாந்து 62 ரன்களுக்கு ஆல் அவுட் ஆக பிரதான காரணம்.

இதற்கு முன்னரும் இங்கிலாந்தில் கிடைத்த வாய்ப்பைப் பயன்படுத்தி சொருகு சொருகென்று சொருகினார். அதாவது வேகப்பந்து வீச்சுக்கு சாதகமாக இருந்தால்தான் விக்கெட் எடுப்பார் என்ற ரகம் கிடையாது முகமது சிராஜ், அந்த வகையில் சிராஜ் ஒரு பாகிஸ்தான் ரக வேகப்பந்து வீச்சாளரே.

இதுவரை 10 டெஸ்ட் போட்டிகளில் 33 விக்கெட்டுகளைக் கைப்பற்றியுள்ளார். அதற்குள்ளேயே சிராஜ் சிலபல முக்கியமான ஓவர்களை டெஸ்ட் கிரிக்கெட்டில் வீசி இன்றியமையாதவர் ஆகிவிட்டார்.

இதைத்தான் நியூசிலாந்து அணியின் முன்னாள் கேப்டனும் இடது கை ஸ்பின்னருமான டேனியல் வெட்டோரி கூறுகிறார், “ஒவ்வொரு முறை டெஸ்ட் மேட்சுக்கு சிராஜ் திரும்பும்போது ஏதோ ஒன்று நிகழ்கிறது. அணிக்கு ஆற்றல் தேவைப்படும் போது கோலி, சிராஜிடம் தான் செல்கிறார்.

சிராஜ் பந்துகளின் வேகத்தில் மாற்றமில்லை. ஆனால் ஆக்ரோஷமாக ஓடி வந்து ஒரு வேகப்பந்து வீச்சாளரின் வேலை என்னவோ அதை கச்சிதமாகச் செய்கிறார் சிராஜ் என்கிறார் வெட்டோரி

சிராஜை இனி அணியில், லெவனில் எடுத்தேயாக வேண்டும் இதனால் இஷாந்த் சர்மாவை முடிந்து போய் விட்டார் என்று நான் கூறவில்லை. சிராஜ் போன்ற ஒருவர் அணிக்குள் வந்து இந்திய அணிக்காக இப்படி ஆடுவதற்கான நேரம் தகைந்து வந்துள்ளது, அதைப் பயன்படுத்திக் கொள்ள வேண்டும். தென் ஆப்பிரிக்காவில் நிச்சயம் சிராஜின் சேவை இந்தியாவுக்கு தேவை” என்கிரார் டேனியல் வெட்டோரி.