’கிங்’ கோலியை பின்னுக்குத் தள்ளி புதிய சாதனை படைக்க இருக்கும் ’ஹிட் மேன்’ ரோஹித்...!

வங்கதேச அணிக்கு எதிரான நாளைய டி20 போட்டியில், ரோஹித் சர்மா, விராட் கோலியை பின்னுக்குத்தள்ளி புதிய சாதனையை படைக்க காத்திருக்கிறார்.

வங்கதேச கிரிக்கெட் அணி, இந்தியாவில் சுற்றுப்பயணம் செய்துள்ள நிலையில், இரு அணிகளுக்கு இடையிலான முதல் டி-20 போட்டி, டெல்லி அருண் ஜெட்லி மைதானத்தில் நாளை நடக்க உள்ளது.

டெல்லியில் காற்று மாசு பிரச்னை தீவிரமாக உள்ள நிலையில் அங்கு இயல்பு வாழ்க்கை வெகுவாகப் பாதிக்கப்பட்டு இருக்கிறது. நேற்று பயிற்சியில் ஈடுபட்ட வீரர்கள், முகத்தில் மாஸ்க் அணிந்தே இருந்தனர். எனினும், முதல் டி20 போட்டி திட்டமிட்டபடி நடக்கும் என்று இந்திய கிரிக்கெட் வாரியத் தலைவர் சவுரவ் கங்குலி தெரிவித்திருந்தார்.

நாளை நடைபெறும் போட்டியில் ரோஹித் சர்மா புதிய சாதனை படைக்க இருக்கிறார். அதாவது டி-20 போட்டிகளில் அதிக ரன்கள் குவித்த வீரராக முதலிடத்தில் இருக்கிறார், விராத் கோலி. அவர் 67 போட்டிகளில் 2450 ரன்களுடன் முதலிடத்தில் இருக்கிறார்.

ரோஹித் சர்மா 90 போட்டிகளில் விளையாடி 2443 ரன்களுடன் இரண்டாவது இடத்தில் இருக்கிறார். நாளை நடக்கும் போட்டியில் ரோகித் சர்மா 7 ரன்கள் எடுத்தால், அவர், டி20 போட்டிகளில் சர்வதேச அளவில் அதிக ரன்கள் குவித்த வீரர் என்ற சாதனையை படைப்பார்.

வங்க தேசத்திற்கு எதிரான டி20 தொடரில் கோலிக்கு ஓய்வு அளிக்கப்பட்டுள்ளதால், ரோஹித் சர்மா தலைமையில் இந்திய அணி களமிறங்க உள்ளது. இதனால், ரோஹித் மிக எளிதாக மேற்கண்ட சாதனையை படைப்பார் என்று கூறப்படுகிறது.

தற்போது வரை, டி 20 போட்டிகளில் அதிக ரன்கள் குவித்தவர்கள் பட்டியலில் விராட் கோலி, ரோஹித் சர்மாவுக்கு அடுத்தபடியாக, நியூஸிலாந்தின் மார்டின் கப்தில் (2285 ரன்கள்), பாகிஸ்தானின் சோயப் மாலிக் (2263 ரன்கள்), நியூசிலாந்தின் மெக்கல்லம் (2140 ரன்கள்) ஆகியோர் உள்ளனர்.