இந்திய அணியில் யாரும் செய்யாத சாதனையை ரோஹித் சர்மா செய்தார்!

இந்திய அணியின் தொடக்க ஆட்டக்காரரான ரோஹித் சர்மா, வங்கதேசத்துக்கு எதிரான போட்டியில், 92 பந்துகளுக்கு 104 ரன்களைக் குவித்து ஆட்டமிழந்தார்.

ஒரே உலகக் கோப்பை தொடரில் 4 சதங்களை விளாசிய முதல் இந்திய வீரர் என்ற சாதனையை படைத்துள்ளார்.

2003-ம் ஆண்டு நடைபெற்ற உலகக் கோப்பை தொடரில் சவுரவ் கங்குலி 3 சதங்களை விளாசியதே, இந்தியரின் சாதனையாக இருந்தது. அந்த சாதனையை தற்போது ரோஹித் சர்மா முறியடித்துள்ளார்.

ஒரே உலகக் கோப்பை தொடரில் 4 சதங்களை விளாசிய இலங்கை வீரர் குமார சங்ககாராவின் சாதனையை சமன் செய்துள்ளார். கடந்த 2015-ம் ஆண்டு உலகக் கோப்பை தொடரில், தொடர்ந்து 4 சதங்களை சங்ககாரா விளாசினார்.

தென்ஆப்பிரிக்க அணிக்கு எதிராக 122 ரன்களைக் குவித்த ரோஹித் சர்மா, பாகிஸ்தான் அணிக்கு எதிராக 140 ரன்களையும், இங்கிலாந்து அணிக்கு எதிராக 102 ரன்களையும் விளாசினார்.

544 ரன்களைப் பெற்றுள்ள ரோஹித் சர்மா, இந்தத் தொடரில், அதிக ரன்களைக் குவித்தவர் பட்டியலில் முதலிடத்தில் உள்ளார்.