அனில் கும்ப்ளேவின் 18 ஆண்டுகால சாதனையை தகர்த்த ரவிசந்திரன் அஸ்வின்... உலகளவில் டாப் 2

இந்தியா- ஆஸ்திரேலியா அணிகளுக்கு இடையிலான பார்டர்-கவாஸ்கர் கோப்பைக்கான டெஸ்ட் தொடரின் முதலாவது போட்டி நாக்பூரில் வியாழக்கிழமை தொடங்கியது. டாஸ் வென்ற ஆஸ்திரேலிய அணி பேட்டிங் தேர்வு செய்தது.

அதன்படி, ஆஸ்திரேலிய அணி முதல் இன்னிங்ஸ் முடிவில் 63.5 ஓவர்களில் 177 ரன்கள் எடுத்து ஆல்-அவுட் ஆனது. இந்திய அணியில் மிகச்சிறப்பான பந்துவீச்சை வெளிப்படுத்திய ஜடேஜா 5 விக்கெட்டுகளையும், அஸ்வின் 3 விக்கெட்டுகளையும், ஷமி, சிராஜ் தலா ஒரு விக்கெட்டையும் கைப்பற்றினர்.

இந்தப் போட்டியில் 54வது ஓவரை வீசிய அஸ்வின் ஆஸ்திரேலியாவின் அலெக்ஸ் கேரியின் விக்கெட்டை வீழ்த்தினார். இதன்மூலம் சர்வதேச டெஸ்ட் கிரிக்கெட்டில் 450 விக்கெட்டுகளுக்கு மேல் வீழ்த்தி புதிய சாதனையைப் படைத்தார். அஸ்வின் இந்த சாதனையை எட்ட 89 டெஸ்ட் போட்டிகளை எடுத்துக் கொண்டுள்ளார். அதேவேளையில், அனில் கும்ப்ளே தனது 93வது டெஸ்டில் 450வது டெஸ்ட் விக்கெட்டை எடுத்தார்.

இதன்மூலம் அஸ்வின், கும்ப்ளேவை பின்னுக்குத் தள்ளி, அதிவேகமாக 450 விக்கெட்டுகளை வீழ்த்திய இந்தியப் பந்துவீச்சாளர் என்ற சாதனையை படைத்துள்ளார். இலங்கை முன்னாள் சுழற்பந்து வீச்சாளர் முத்தையா முரளிதரன் தனது 80வது டெஸ்ட் போட்டியில் 450 விக்கெட்டுகளை வீழ்த்தி இப்பட்டியலில் முதலிடத்தில் நீடிக்கிறார்.

அதோடு, சர்வதேச டெஸ்ட் கிரிக்கெட்டில் 3000 ரன்கள் மற்றும் 450 விக்கெட்டுகள் எடுத்த 3வது வீரர் என்ற சாதனையை அஸ்வின் படைத்துள்ளார். தற்போது சர்வதேச அளவில் டெஸ்ட் கிரிக்கெட்டில் அதிக விக்கெட் வீழ்த்தியவர்களில் அஸ்வின் 9-வது இடத்தில் உள்ளார்.