தந்தையை மிஞ்சிய மகன்.. அறிமுக போட்டியில் பேட்டிங்கில் மட்டுமல்ல பவுலிங்கிலும் அர்ஜூன் அசத்தல்

கிரிக்கெட் ஜாம்பாவன் சச்சின் டெண்டுல்கர் மகன் அர்ஜூன் டெண்டுல்கரும் கிரிக்கெட்டின் மீது ஆர்வம் காட்டி வருகிறார். 23 வயதான அர்ஜூன் டெண்டுல்கர் இடது கை பேட்ஸ்மேன் மற்றும் பவுலரான அவர் உள்ளூர் கிரிக்கெட்டில் மும்பை அணிக்காக விளையாடி வந்தார். அர்ஜுன் மும்பை ரஞ்சி அணியில் இருந்தாலும், அவருக்கு விளையாட வாய்ப்பு கிடைக்கவில்லை.

தற்போது நடப்பு உள்ளூர் கிரிக்கெட் போட்டியான ரஞ்சி தொடரில் கோவா அணிக்காக அர்ஜூன் அறிமுகமானார். ராஜஸ்தான் அணிக்கு எதிரான போட்டியில் விளையாடிய அர்ஜூன் சதம் விளாசி அசத்தினார். ஏழாவது இடத்தில் பேட்டிங் செய்ய வந்த அர்ஜூன் 207 பந்துகளில் 120 ரன்கள் எடுத்தார். இதில் 16 பவுண்டரிகளும் 2 சிக்ஸர்களும் அடங்கும்

1988-ல் சச்சின் தனது முதல் ரஞ்சி போட்டியில் சதம் விளாசி இருந்தார். இப்போது 2022-ல் அவரது மகன் அர்ஜுனும் முதல் ரஞ்சி போட்டியில் சதம் விளாசி அனைவரது பாராட்டையும் பெற்றார். மேலும் அர்ஜூன் இந்த போட்டியில் பேட்டிங் மட்டுமல்லாமல் பந்துவீச்சிலும் ஜொலித்து உள்ளார்.

அர்ஜுன் 23.1 ஓவரில் 3 விக்கெட்டுகளை வீழ்த்தினார். அறிமுக போட்டியிலேயே சதத்துடன் 3 விக்கெட்டுகளை வீழ்த்திய வீரர் என்ற சாதனையை படைத்தார். அறிமுக போட்டியில் சதமடித்தது மட்டுமில்லாமல் 3 விக்கெட்களை வீழ்த்தி தந்தையை மிஞ்சிய மகன் என்று பெயர் பெற்றுள்ளார்.

ஆனால் ஒரே போட்டியின் மூலம் சச்சினின் அனைத்து சாதனைகளையும் ஒப்பிட்டு அர்ஜூனை புகழ முடியாது. அர்ஜூன் இதே வேகத்தில் விளையாடி வந்தால் இந்திய அணிக்கு சிறந்த ஆல்ரவுண்டர் கிடைப்பார் என்பதில் சந்தேகமில்லை.

இந்த போட்டியில் முதலில் விளையாடிய கோவா அணி முதல் இன்னிங்சில் 547 ரன்கள் எடுத்தது. இதையடுத்து விளையாடிய ராஜஸ்தான் அணி முதல் இன்னிங்சில் 456 ரன்களுக்கு ஆட்டமிழந்தது. கோவா பந்துவீச்சாளர்களில் மோஹித் 5 விக்கெட்டுகளையும், .அர்ஜுன் டெண்டுல்கர் 3 விக்கெட்டுகளை வீழ்த்தினர் என்பது குறிப்பிடதக்கது.