ஏன் ‘பாக்சிங் டே டெஸ்ட்’ என அழைக்கிறார்கள்? சுவாரஸ்யமான தகவல்

ஆண்டுதோறும் டிசம்பர் 26-ம் தேதி தொடங்கும் போட்டியை ‘பாக்சிங் டே டெஸ்ட்’ என அழைக்கப்படுவது ஏன் என்பதற்கு சுவாரஸ்யமான காரணம் சொல்லப்படுகிறது.

ஒவ்வொரு ஆண்டும் யேசு கிறிஸ்து பிறந்த நாளான டிசம்பர் 25-ம் தேதி கிறிஸ்துமஸ் தினமாக கொண்டாடப்பட்டு வருகிறது. இங்கிலாந்து, ஆஸ்திரேலியா, நியூசிலாந்து, கனடா உள்ளிட்ட பல நாடுகளில் கிறிஸ்துமஸ் தினத்தின்போது கிறிஸ்துவ தேவாலயங்களில் பெரிய உண்டியல் பெட்டி வைக்கப்படும். அதாவது, ஒரு பாக்ஸ் வைக்கப்படும்.

தேவாலயங்களில் உள்ள இந்த பாக்சில் பரிசுப் பொருட்கள் மற்றும் நன்கொடை பணத்தை பலர் போடுவார்கள். ஒருநாள் முழுவதும் நன்கொடைகள் சேகரிக்கப்பட்டு, கிறிஸ்துமஸ் தினத்துக்கு மறுநாள் 26-ம் தேதி, பெட்டியை திறந்து அதில் உள்ள பரிசுப் பொருட்களை ஏழைகளுக்கு வழங்கப்படுவது வழக்கமாக இருந்து வருகிறது.

அதனால் தான், டிசம்பர் 26-ம் தேதியை ‘பாக்சிங் டே’ என்று அழைக்கிறார்கள். இதற்கு வேறு ஒரு காரணமும் சொல்லப்படுகிறது. கூலி தொழிலாளர்கள் கிறிஸ்துமஸ் தின கொண்டாட்டத்துக்காக தங்களது குடும்பத்தினரை பார்க்க செல்லும்போது, அவர்களது முதலாளிகள் கிறிஸ்துமஸ் பரிசுப் பொருட்களை ‘பாக்ஸ்’ போல் பரிசாக வழங்குவார்களாம். இதுவும், ‘பாக்சிங் டே’ என்று அழைக்கப்படுதற்கு காரணமாம்.

மெல்போர்னில் இந்தியா - ஆஸ்திரேலியா அணிகள் மோதும் 3-வது டெஸ்ட் போட்டி ‘பாக்சிங் டே’ அன்று தொடங்கியதால், அந்த டெஸ்ட் போட்டி ‘பாக்சிங் டே டெஸ்ட்’ என அழைக்கப்படுகிறது. ‘பாக்சிங் டே’ என்றால் பலர் நினைப்பது போல் குத்துச்சண்டை தினம் என்ற அர்த்தம் இல்லை.