IND vs SA, 1st T20I: ஒன்று உம்ரன் மாலிக்கை தேர்வு செய் இல்லையேல் குழி பிட்ச் போடு- தோல்விக்குப் பிறகு இந்திய அணி ‘மைன்ட் வாய்ஸ்’

நேற்று டெல்லி என்ற ‘பொட்டி’ மைதானத்தில் நடைபெற்ற இந்திய-தென் ஆப்பிரிக்க அணிகளுக்கு இடையிலான முதல் டி20 போட்டி ரன் விருந்தாக, சிக்சர்கள் பவுண்டரி யாக அமைந்தாலும் இந்திய அணியின் தொடர் டி20 போட்டி வெற்றிகளுக்கு முட்டுக்கட்டை போட்டு தென் ஆப்பிரிக்கா அபாரமாக வென்று தொடரில் 1-0 என்று முன்னிலை வகிக்கிறது.

மொத்தம் நேற்று மட்டும் 7 விக்கெட்டுகளை மட்டுமே இழந்து 39.1 ஓவர்களில் 423 ரன்கள் குவிக்கப்பட்டுள்ளது என்றால் மைதானத்தில் லட்சணத்தைப் புரிந்து கொள்ளலாம். வெறும் பேப்பரை சுற்றி விட்டெறிந்தால் சிக்ஸ் போய்விடும் போல் உள்ளது.

இந்திய அணி செலக்‌ஷனிலும் தடுமாறியது, ஆவேஷ் கான் நேற்றைய காட்டடி தர்பாரில் சிக்கனமாகவே வீசினார் ஆனால் உம்ரன் மாலிக் போல் விக்கெட்டுகளைக் கைப்பற்றும் பவுலர் தேவை.

அவரை உட்காரவைத்ததன் மூலம் திராவிட்-ரிஷப் பண்ட் படைக்கு மூக்குடைப்புதான் நிகழ்ந்தது. நேற்று மொத்தம் 28 சிக்சர்கள் 33 பவுண்டரிகள் விளாசப்பட்டன, இதில் ஆவேஷ் கான் ஒரு சிக்சரைக் கூட கொடுக்கவில்லை என்பதும் குறிப்பிடத்தக்கது.

க்சர் படேலுக்குப் பதில் உம்ரன் மாலிக்கை வைத்திருக்க வேண்டும், ஆனால் ஒருவிதத்தில் உம்ரன் மாலிக்கிற்கு இது நல்லது, ஏனெனில் அவரும் இருந்து இந்த காட்டடியில் சிக்கியிருந்தால் அவரது தன்னம்பிக்கையும் போயிருக்கும், நம்மூர் நெட்டிசன்களின் கேலிக்கும் கிண்டலுக்கும் ஆளாக வேண்டியிருந்திருக்கும்.

உம்ரன் மாலிக்கை எடுப்பது ரிஸ்க், ஆனால் அந்த ரிஸ்க்கை இந்திய அணி நிர்வாகம் ஒரு கட்டத்தில் எடுத்தேயாக வெண்டும். அதை இப்போதே எடுத்தால் நல்லது, திடீரென ஆஸ்திரேலியாவில் இங்கிலாந்தில் கொண்டு போய் அங்கு அவரை பலிகடா ஆக்குவதை விட இங்கேயே அவர் தேற வழிவகை செய்ய வேண்டும்.

நேற்று தென் ஆப்பிரிக்கா தன் டி20 வரலாற்றில் அதிகபட்ச இலக்கை வெற்றிகரமாக துரத்திய நாளாக அமைந்தது. ரசீ வாண்டர் டசன் மற்றும் டேவிட் மில்லர் 4வது விக்கெட்டுக்காக 11 ஓவர்களில் 131 ரன்களை உடைக்க முடியாமல் எடுத்து வெற்றி பெறச் செய்தனர்.

இஷான் கிஷன் இத்தனை சவுகரியமாக ஆடினார் என்றால் பிட்சின் தன்மையை பார்த்துக் கொள்ளலாம் இந்தியா 17 சிக்ஸ், 14 நான்குகளை அடிக்க தென் ஆப்பிரிக்கா 14 சிக்ஸ் 17 பவுண்டரிகளை எடுத்தது.

தென் ஆப்பிரிக்காவில் தெம்பா பவுமா ஐபிஎல் கிரிக்கெட்டையெல்லாம் பார்க்க மாட்டார் போலிருக்கிறது, மணிக்கு 145 கிமீ வேகம் வீசினால் தொடை நடுங்கி இஷான் கிஷன் எப்படி ஆடுவார் என்பதை நாம் பார்த்தோம் இங்கு கொண்டு வந்து கேசவ் மகராஜ், ஷம்சியிடம் கொடுக்கிறார், இருவரும் சேர்ந்து 70 ரன்களை கொடுத்தனர்.

ஒரு கட்டத்தில் தென் ஆப்பிரிக்காவுக்கு வெற்றி பெறும் ரன் விகிதம் 14ஐ தொட்டது, ஆனால் டேவிட் மில்லர் (64), போட்டு பின்னி எடுத்தார், புவனேஷ்வர் குமார், ஹர்ஷல் படேல் 8 ஓவர்களில் 86 ரன்களை வாரி வழங்கினர். தென் ஆப்பிரிக்க அணி நிறைய கேட்ச்களை விட்டாலும் சிஎஸ்கே அணி செய்யத் தவறியதைச் சுட்டிக்காட்டுமாறு டிவைன் பிரிடோரியசை முன்னால் இறக்கி விட்டனர், அவர் 13 பந்துகளில் 29 ரன்களை 4 சிக்சர்களுடன் விளாசினார். ஹர்திக் பாண்டியாவை ஒரே ஓவரில் 3 சிக்ஸ் அடித்து ஐபிஎல் பைனல் ‘சாதனை நாயகனை(!)’ பந்து வீச்ச்சிலிருந்தே வெளியேறச் செய்தார் பிரிட்டோரியஸ்.

இது போன்ற பொட்டி கிரவுண்டில் ஒரு அதிவேக பவுலர் இருந்து தென் ஆப்பிரிக்காவின் இரண்டு அதிரடி வீரர்களை ஒன்று உடலில் கையில் காலில் அடிவாங்கச் செய்து பயத்தை ஏற்படுத்தியிருந்தாலோ அல்லது அவர் 2 பேரின் குச்சிகளை கழற்றியிருந்தாலோ நிச்சயம் 212 ரன்கள் இலக்கை இத்தனை சுலபமாக விரட்டியிருக்க முடியாது.

இந்திய அணி பரிசோதனைகள் செய்யலாம் ஆனால் அது வாய்ப்பு கொடுக்கும் வீரர்களுக்கு நம்பிக்கை ஊட்டுவதாக இருக்க வேண்டும், உதாரணத்துக்கு ஆவேஷ் கான் விக்கெட் இல்லாமல் முடிந்தார், ஹர்ஷல் படேல் ஓரே ஓவரில் 22 ரன்கள் விளாசப்பட்டார், பாண்டியாவ்ன் ஆல்ரவுண்ட் திறமை இன்னும் சந்தேகமாகவே உள்ளது, ருதுராஜ், இஷான் கிஷன் நல்ல வேகப்பந்து வீச்சுக்கு எதிராக டைமிங் இன்றி திண்டாடியது பட்டவர்த்தனமாகியுள்ளது.

இந்தக் கோளாறுகளை ஒன்று சரி செய்ய வேண்டும் இல்லையெனில் பழைய பாணியில் உங்களுக்கெல்லாம் இந்த மாதிரி பிட்ச் போட்டல் வெற்றி பெறத்தான் செய்வீர்கள், இனி பாருங்கள் குழிப்பிட்சைப் போட்டு ஸ்பின்னை வைத்து உங்களைக் காலி செய்கிரோ என்ற மனோபாவத்துக்குச் செல்ல வேண்டி வரும். ரிஷப் பண்ட் கேப்டன்சி போதாது என்பதை பலரும் சுட்டிக்காட்டியும் அவரை கேப்டனாகப் போட்டதும் ஒரு தவறு, தோல்விகள் அவரது பேட்டிங்கைக் காலி செய்தால் அதற்கு இந்திய அணி நிர்வாகமே பொறுப்பேற்க வேண்டும்.