CPL 2021: கரீபியன் பிரீமியர் லீக்: இம்ரான் தாகிர், ஹெட்மையர் திருப்பு முனை- ஷோயப் மாலிக் அறுவை

கரீபியன் பிரீமியர் லீக் 2021 போட்டிகள் ஆரம்பமாகிவிட்டன. கலர்ஃபுல் ஆன இந்த தொடரின் முதல் போட்டியில் கயானா அமேசான் வாரியஸ் அணி கடந்தமுறை சாம்பியன் ட்ரின்பாகோ நைட் ரைடர்ஸ் அணியை வீழ்த்தினர்.

2021 கரீபியன் பிரீமியர் லீக் தொடங்கியது, இதன் முதல் போட்டியில் கயானா அமேசான் வாரியர்ஸ் அணி கடந்த முறை சாம்பியன் ஆன ட்ரின்பாகோ நைட் ரைடர்ஸ் அணியை 9 ரன்களில் வீழ்த்தியது. நைட் ரைடர்ஸ் அணி டாஸ் வென்று அமேசான் வாரியர்ஸ் அணியை பேட் செய்ய அழைத்தது. ஷிம்ரன் ஹெட்மையரின் அதிரடி 50 ரன்களையும் மீறி கயானா அணியை ட்ரின்பாகோ அணி 142/7 க்கு மட்டுப்படுத்தியது.

ஆனால் இந்த இலக்கை தன் அபாரமான பவுலிங் மூலம் கயானா அணி வெற்றிக்கான ரன் எண்ணிக்கையாக மாற்றியது, முதல் போட்டியில் வெற்றியுடன் தொடங்கியது.

அமேசான் வாரியர்ஸ் இன்னிங்ஸை அபாரமாகத் தொடங்கியது சந்தர்பால் ஹேம்ராஜ் 2 சிக்சர்களை விளாசினார், ஆனால் சுனில் நரைன் பவுலிங் வீச வந்தவுடன் ஷார்ட் தேர்ட் மேனில் கேட்ச் கொடுத்து வெளியேறினார். பிறகு அமேசான் வாரியஸ் ஆச்சரியகரமாக அதிரடி வீரர் ஒடியன் ஸ்மித்தை 3ம் நிலையில் இறக்கினர்.

ஒடியன் ஸ்மித் 15 பந்துகளில் 24 ரன்களை விளாசி தன்னை புரமோட் செய்ததை நிரூபித்தார். ஆனால் இவர் ஆட்டமிழந்தவுடன் அமேசான் இன்னிங்ஸ் பிசுபிசுத்துப் போய் 10 ஓவர்கள் முடிவில் 57/3 என்று இருந்தது.

5 ஓவர்கள் மீதமிருக்கையில் கேப்டன் நிகோலஸ் பூரன் 7ம் நிலையில் இறங்கினார். ஹெட்மையரும் இவரும் ஸ்கோரை ஏற்ற முயற்சிக்கையில் பவுண்டரியில் டேரன் பிராவோ எல்லைக் கோட்டில் எடுத்த அபாரமான உள்ளே-வெளியே கேட்சுக்கு வெளியேறினார் பூரன்.

ஷோயப் மாலிக் செம அறுவையாக ஆடி 12 பந்துகளில் 2 ரன்கள் எடுத்து இசுரு உதனா பந்தில் வெளியேறினார். முகமது ஹபீஸை அகீல் ஹுசைன் காலி செய்ய அமேசான் தடுமாறியது.

ஆனால் ஷிம்ரன் ஹெட்மையர் ஹிட்மையர் ஆகி வெளுத்து வாங்கி சிபிஎல் 2021-ன் முதல் அரைசதத்தை எடுத்து 142 ரன்கள் என்ற ஒரு மாதிரியான எளிதா-கடினமா என்று கணிக்க முடியாத இலக்கை நிர்ணயித்தார்.

இலக்கை விரட்டும்போது சாம்பியன் நைட் ரைடர்ஸ் அணி அதிரடி வீரர்களான லெண்டில் சிம்மன்ஸ், கொலின் மன்ரோவை இழந்த போதிலும் பவர் ப்ளே முடிவில் வலுவான ரன் ரேட்டிலேயே இருந்தது.

திருப்பு முனையாக வந்தவர் அமேசான் வாரியர்ஸ் அணியின் தென் ஆப்பிரிக்கா ஸ்பின்னர் இம்ரான் தாகிர், இவர் சுனில் நரைன், பிராவோ இருவரையும் வீட்டுக்கு அனுப்ப ரெகுலராக விக்கெட்டுகளை இழந்து 133 ரன்களை மட்டுமே எடுத்து நைட் ரைடர்ஸ் தோல்வி தழுவியது