2023 உலகக் கோப்பை... உலகின் மிகப்பெரிய மைதானத்தில் இந்தியா பாகிஸ்தான் மோதல்... முழு விவரம் இதோ

கிரிக்கெட் காதலர்கள் அதிகமுள்ள நாடான இந்தியாவில் தற்போது ஐபிஎல் டி20 திருவிழா களைக்கட்டியுள்ளது. ஐபிஎல் 2023 சீசனை ரசித்து கொண்டிருக்கும் கிரிக்கெட் ரசிகர்களுக்கு இந்தாண்டே மற்றொரு பிரம்மாண்ட விருந்து காத்திருக்கிறது. அது தான் 2023 ஒருநாள் உலக்கோப்பை போட்டிகள்.

இதுவரை இந்தியாவில் மூன்று முறை ஒருநாள் உலகக் கோப்பை போட்டிகள் நடந்துள்ளது. ஆனால் இந்த மூன்று முறையில் இந்தியா மட்டும் இதை தனித்து நடத்தியதில்லை. 1987ல் பாகிஸ்தானுடன் இணைந்தும், 1996 இல் பாகிஸ்தான் மற்றும் இலங்கையுடன் இணைந்தும், 2011 இல் வங்காளதேசம், இலங்கை மற்றும் பாகிஸ்தானுடன் இணைந்து உலகக் கோப்பையை நடத்தியது.

ஆனால் இந்த முறை ஒரு நாள் உலகக் கோப்பையை தனியாக நடத்தவுள்ளது. உலகக் கோப்பை போட்டிக்கான ஆயத்த பணிகளை மேற்கொள்ளும் பிசிசிஐ சில முக்கிய முடிவுகளை எடுத்துள்ளதாக செய்திகள் வெளியாகின. அதன்படி, போட்டி அட்டவணை மற்றும் அவை நடைபெறும் மைதானங்கள் இறுதி செய்யப்பட்டு வருகின்றது.

இந்தியா - பாகிஸ்தான் இரு அணிகளும் இந்திய மண்ணில் 2016ஆம் ஆண்டுக்குப் பிறகு நேருக்கு நேர் சந்திக்கவுள்ளன. இந்தியா-பாகிஸ்தான் போட்டி என்பது இரு நாட்டு கிரிக்கெட் ரசிகர்களுக்கும் விருந்து. ஆஸ்திரேலியா, இங்கிலாந்து போன்ற இடங்களில் இந்தியா மற்றும் பாகிஸ்தான் போட்டிகளுக்கு மைதானங்கள் ரசிகர்களால் நிரம்பி வழிகின்றன.

அப்படி இருக்க இந்தியாவில் இரு அணிகள் மோதும் போட்டி என்றால் மைதானம் ரசிகர்கள் ஆர்பரிப்பால் நிச்சயம் குலுங்கும். அத்ததைய திறன் கொண்ட மைதானத்தில் தான் இந்தியா பாகிஸ்தான் இடையேயான போட்டியை நடத்த பிசிசிஐ தயாராகிவிட்டதாக தகவல் வெளியாகியுள்ளது.

அதன்படி உலகின் மிகப்பெரிய கிரிக்கெட் ஸ்டேடியம் என்ற சாதனையை படைத்த நரேந்திர மோடி மைதானத்தில் இந்தியா-பாகிஸ்தான் போட்டி நடைபெறவுள்ளதாகக் கூறப்படுகிறது. ரசிகர்களுக்காகவே ஒரு லட்சத்துக்கும் அதிகமான திறன் கொண்ட அகமதாபாத் மைதானம் தேர்வு செய்யப்பட்டுள்ளதாக தெரிகிறது.

ஐபிஎல் முடிந்த பிறகு உலகக் கோப்பை அட்டவணையும் அறிவிக்கப்படும் எனத் தெரிகிறது. தற்போதைய தகவலின்படி இந்த பிரம்மாண்ட நிகழ்வான ஒருநாள் உலகக் கோப்பை அக்டோபர் 5ம் தேதி தொடங்க வாய்ப்புள்ளதாக தெரிகிறது. இந்த கணக்கீட்டின்படி, அக்டோபர் 7ஆம் தேதி (ஞாயிற்றுக்கிழமை) இந்தியா-பாகிஸ்தான் இடையேயான போட்டி நடைபெற வாய்ப்புள்ளது.