பகல்பத்து 4ம் நாள்.. கிருஷ்ணர் சவுரி கொண்டை அலங்காரத்தில் எழுந்தருளிய நம்பெருமாள்

108 திவ்யத் தேசங்களில் முதன்மையானதும், பூலோக வைகுண்டம் என்று போற்றப்படுவதுமான திருத்தலம், ஸ்ரீரங்கம் அருள்மிகு ரங்கநாதர் கோயில். இக்கோயிலில் ஆண்டு முழுவதுமே விழாக்கள் நடைபெற்றாலும் கூட, வைகுண்ட ஏகாதசி பெருவிழா சிறப்பு வாய்ந்த திருவிழாவாக விளங்கி வருகிறது.

அந்த வகையில் இன்று வைகுண்ட ஏகாதசி திருவிழாவின் பகல்பத்து 4ஆம் நாளாகும். இந்த நிகழ்ச்சியில் சவுரி கொண்டை அலங்காரத்தில் எழுந்தருளிய நம்பெருமாள் பக்தர்களுக்கு அருள்பாலித்தார்.

வைகுண்ட ஏகாதசி பெருவிழா, பகல்பத்து உற்சவத்தின் 4 ஆம் தாளான இன்று காலை  நம்பெருமாள், ஆண்டாள் சாய் கொண்டை அணிந்து, நாச்சியார், அழகிய மணவாளன் பதக்கம், மகரி, சந்திர ஹாரம், வைர மூன்றடுக்கு மகர கண்டிகை, அடுக்குப் பதக்கங்கள், வைர அபயஹஸ்தத்துடன், செந்தூர வர்ண வஸ்திரம், தங்கப்பூண் பவள மாலை, இரண்டு வடம் பெரிய முத்துச்சரம், பொட்டு நெல்லிக்காய் மாலை முன் மார்பில் சாற்றிக் கொண்டு இருந்தார்.

மேலும் பங்குனி உத்திர பதக்கம், புஜ கீர்த்தி, தாயத்து தொங்குச் சரம் கைகளில் சாற்றி அணிந்து, மூலஸ்தானத்திலிருந்து புறப்பாடாகி அர்ச்சுன மண்டபத்தில் எழுந்தருளி பக்தர்களுக்கு சேவை சாதித்தார்.