ஸ்ரீரங்கத்தில் சித்திரை தேரோட்டம்... ரங்கா.. கோவிந்தா.. கோஷங்கள் முழங்க பல்லாயிரக்கணக்கான பக்தர்கள் தேரை வடம் பிடித்து இழுத்தனர் (படங்கள்)

ஸ்ரீரங்கம் ரங்கநாதர் கோயில் சித்திரை தேரோட்டம் இன்று வெகுவிமரிசையாக நடைபெற்றது.

பூலோக வைகுண்டம் என்று போற்றப்படுவதும், 108 வைணவ திவ்ய தேசங்களில் முதன்மையானதுமான திருத்தலம், திருச்சி ஸ்ரீரங்கம் ரங்கநாதர் கோயில்.

இங்கு ஆண்டு முழுவதும் விசேஷம் என்றாலும், ஆண்டுதோறும் சித்திரை மாதம் நடைபெறும் 'விருப்பன் திருநாள்' என்று அழைக்கப்படும் சித்திரைத் தேரோட்டம் வெகுபிரசித்திப் பெற்றது.

கொரானா கட்டுப்பாடுகள் காரணமாக கடந்த, 2 ஆண்டுகளாக சித்திரைத் திருவிழா தேரோட்டம் நடைபெறவில்லை. இந்நிலையில், இந்த ஆண்டுக்கான சித்திரைத் தேர் திருவிழா கடந்த, 21ம் தேதி கொடியேற்றத்துடன் தொடங்கியது. தினமும் காலை, மாலை உற்சவர் நம்பெருமாள் புறப்பாடு கண்டருளினார். தினமும் ஒரு வாகனத்தில் எழுந்தருளி திருவீதி உலா வந்து பக்தர்களுக்கு சேவை சாதித்தார்.

விழாவின் முக்கிய திருவிழாவான தேரோட்டம், இன்று கோலாகலமாக நடைபெற்றது. "ரங்கா.. ரங்கா.. கோவிந்தா.. கோவிந்தா.." கோஷங்கள் முழங்க, பல்லாயிரக்கணக்கான பக்தர்கள் தேரை வடம் பிடித்து இழுத்தனர்.

முன்னதாக, இன்று அதிகாலை 4:45 மணிக்கு, ஸ்ரீவில்லிபுத்தூர் ஆண்டாள் சூடிக் கொடுத்த கிளிமாலை மற்றும் பச்சைப் பட்டு உடுத்தி, உற்சவர் நம்பெருமாள் கண்ணாடி அறையில் இருந்து தேருக்கு புறப்பட்டு கண்டருளினர்.

தொடர்ந்து, சித்திரை தேர் மண்டபத்தில் எழுந்தருளிய நம்பெருமாள், காலை, 5.30 மணி முதல், 6.15 மணிக்கு, மேஷ லக்னத்தில் நம்பெருமாள் திருத்தேர் தட்டில் எழுந்தருளினார்.

சரியாக காலை, 6.30 மணிக்கு தேர் வடம் பிடித்து இழுக்கப்பட்டது. கோவிலை சுற்றியுள்ள நான்கு சித்திரை வீதிகளிலும் திருத்தேரோட்டம் நடைபெற்றது.  இந்த தேரோட்டத்தில் திருச்சி மட்டுமின்றி, சுற்றுவட்டார பகுதிகளை பல்லாயிரக்கணக்கான பக்தர்கள் பங்கேற்றனர்.

தஞ்சை களிமேடு தேர்த் திருவிழா விபத்து எதிரொலியாக, தேரோடும் வீதிகளில், காலை, 6 மணி முதல் மின்சாரம் நிறுத்தப்பட்டிருந்தது. தேர் நிலையை சென்றடைந்த பிறகே மின்சாரம் வழங்கப்பட்டது.திருச்சி மாநகர காவல்துறை ஆணையர் கார்த்திகேயன் தலைமையில், தேரோடும் வீதிகள் மட்டுமல்லாது, ஸ்ரீரங்கம் முழுவதும், 1000 போலீசார் பாதுகாப்புப் பணியில் ஈடுபட்டிருந்தனர்.