ஜாதகத்தில் சனி தோஷம் இருக்கா? செய்ய வேண்டிய பரிகாரங்கள் என்னென்ன?

ஜோதிடத்தில் மிகவும் செல்வாக்கு செலுத்தும் கிரகமாக சனி கருதப்படுகிறது. சனி நீதியின் கடவுள் என்று போற்றப்படுகிறார். சனி ஒருவரின் கர்மவினைக்கு ஏற்ப நல்ல மற்றும் தீய பலன்களை தருவார். அப்படிப்பட்ட சனியை குளிர்விக்க ஜோதிடத்தில் பல வழிகள் உண்டு. நீதிமானான சனிபகவான், ஒருவரின் வாழ்க்கையில் அனைத்து பாடங்களையும் கற்றுத் தரக்கூடியவர். அவர் நினைத்தால் ஏற்றமும் தருவார். ஆணவச் சிந்தனையில் உள்ளவர்களுக்குப் பாடங்களைக் கற்றுத் தருவார். சனிபகவானால் ஏற்படும் தோஷங்களுக்கு சில பரிகாரங்கள் கட்டாயமாகும்.

சிலரின் ஜாதகத்தில் அல்லது கோள்சார நிலையின்போது சனி சாதகமற்ற நிலையில் இருக்கும் . அப்போது அவருக்கு சனிபகவானால் பிரச்சினைகள் ஏற்படும். அப்படி சனி தோஷம், நீங்கி நம்முடைய வாழ்க்கையில் நலம் பெற எளிய பரிகாரம் உள்ளது. அது குறித்து இந்த பதிவில் தெரிந்துக் கொள்ளலாம்.

சனிபகவானின் தோஷம் நீங்க சிவராத்திரியில் சிவனை வழிபடுங்கள். சிவனை வழிபடுவதால் சனிக்கு தனி அந்தஸ்து கிடைக்கும். அதனால் தோஷங்க நீங்கும் . மேலும் சிவ வழிபாடு சனி பகவானை சாந்தம் அடைய செய்யும் என்பது நம்பிக்கை..

ஜோதிட சாஸ்திரப்படி மிதுனம், துலாம், தனுசு, கும்பம் ஆகிய ராசிகளில் சனிக்கு தனி கவனம் உண்டு. இந்த ராசிக்காரர்கள் சனியின் கோபத்தை உண்டாக்கும், மோசமான பலன்களைத் தரும் எந்த ஒரு வேலையையும் செய்யக்கூடாது. முடிந்தவரை ஏழைகளுக்கு எள்ளன்னம், கருப்பு வஸ்திரங்களை தட்சணையுடன் தானம் தரலாம். இந்த வழிபாட்டை திருநள்ளாறு சென்று நள தீர்த்தத்தில் நீராடி செய்வது மிகச் சிறந்த பலன்களை தரும். திருநள்ளாற்று தர்பாரண்யேஸ்வரரையும், அம்பாளையும், சனி பகவானையும் வழிபடுவது சனி தோஷம் தீர்க்கும்.

கறந்த பசும் பாலினைக் கொண்டு சிவ பெருமானுக்கு அபிஷேகம் செய்வதும், சனிக் கிழமைகளில் சிவனை வில்வம் கொண்டு அர்ச்சித்து, விளக்கேற்றி வழிபடுவதும் சிறப்பு. பிரதோஷ வழிபாடு மிக நன்று. சிவ புராணம், பஞ்சாட்சரம், சுதர்சன மூல மந்திரம், சுதர்சன அஷ்டகம் போன்றவற்றை பாராயணம் செய்வதும், சிறந்த பலன்களை கொடுக்கும்.

விநாயக பெருமானை வழிபடுவதும், ஆஞ்சநேயரை சனிக் கிழமைகளில் துளசி மாலை அல்லது வடை மாலை அணிவித்து, அர்ச்சித்து 27 முறை வலம் வருவதும் அஷ்டமச் சனி தோஷ நிவர்த்தி தரும்.

காக்கைக்கு தினந்தோறும் அன்னம் இடுவதும், உளுந்து தானியத்தை தானம் செய்வதும், கோவில்களில் நவக்கிரகங்களை  9 முறை வலம் வந்து வணங்குவதும், நீலக் கல் அணிந்த மோதிரத்தை அணிந்து கொள்வதும், சனிக் கிழமை அதிகாலை வேளைகளில் சுந்தர காண்டம் பாராயணம் செய்வதாலும் ஏழரைச் சனியின் தோஷம் குறையும்.

சனி தோஷத்தினால் துன்பங்கள் அதிகமாகும் நேரங்களில்,  காலையில் எழுந்து நீராடி, சனி பகவானை  108 முறை வலம் வந்து, ஒவ்வொரு வலம் முடிந்தவுடனும் ஒரு கருப்பு உளுந்தை தரையில் இட வேண்டும். உளுந்து தானியம் தானம் சனி பகானின் நல்லாசி கிடைத்திட அருளும்.

மாதம் மாதம் வரும் சிவராத்திரி நாளில் சனி பகவானை வணங்க சிறந்த நாளாக கருதப்படுகிறது. சிவராத்திரி அன்று மாலை சனி பகவானை வழிபடுவது சனி தோஷங்கள் குறையும். இந்நாளில் சிவன் கோவிலில் சிவ சாலிசா பாடுவது சிறப்பு. அதுவும் மகா சிவராத்திரி என்றால் இன்னும் சிறப்பு.