பழனியில் பங்குனி உத்திரத் திருவிழா... வெள்ளி ஆட்டுக்கிடா வாகனத்தில் வந்த முத்துக்குமாரசாமி

பழனியில் பங்குனி உத்திரத் திருவிழாவை முன்னிட்டு மூன்றாம் நாள் நிகழ்ச்சியாக அருள்மிகு முத்துக்குமாரசாமி வெள்ளி ஆட்டுக்கிடா வாகனத்தில் கிரி வீதி உலா எழுந்தருளினார்.

திண்டுக்கல் மாவட்டம் பழனியில் பங்குனி உத்திரத் திருவிழா கடந்த 12 ம் தேதி திரு ஆவினன்குடி கோயிலில் கொடியேற்றத்துடன் துவங்கியது.

விழாவை முன்னிட்டு திருஆவினன்குடி கோயில் மின்விளக்குகளால் அலங்கரிக்கப்பட்டுள்ளது. பத்துநாள் நடைபெறும் விழாவை முன்னிட்டு நாள்தோறும் பல்லாயிரக்கணக்கான பக்தர்கள் கொடுமுடி தீர்த்தம் எடுத்து பழனி முருகனுக்கு அபிஷேகம் செய்து வருகின்றனர்.

விழாவை முன்னிட்டு நாள்தோறும் சுவாமி தம்பதி சமேதராக பல்வேறு வாகனங்களில் வீதி உலா எழுந்தருள்கிறார். மூன்றாம் நாள் நிகழ்ச்சியாக அருள்மிகு வள்ளி, தெய்வானை சமேதர் முத்துக்குமாரசாமி வெள்ளி ஆட்டுக்கிடா வாகனத்தில் சன்னதி வீதி, கிரிவீதி உலா எழுந்தருளினார்.

முன்னதாக விநாயகர், வீரபாகு ஆகியோர் சப்பரத்தில் எழுந்தருளினார். சுவாமி தம்பதி சமேதராக மேள, தாளம் முழங்க சன்னதி வீதி, கிரிவீதி உலா எழுந்தருளினார். ஏராளமானோர் சுவாமிக்கு தேங்காய் உடைத்து வழிபாடு செய்தனர். வரும் 1ஆம் தேதி திருக்கல்யாணமும், 18ஆம் தேதி பங்குனி உத்திரத் தேரோட்டமும் நடைபெறவுள்ளது.

பழனி பங்குனி உத்திரத் திருவிழா இரண்டாம் நாள் நிகழ்ச்சியாக அருள்மிகு வள்ளி, தெய்வானை சமேதர் முத்துக்குமாரசாமி வெள்ளிக்காமதேனு வாகனத்தில் திருஆவினன்குடி கோயிலில் இருந்து சன்னதி வீதி, கிரிவீதி உலா எழுந்தருளினார் என்பது குறிப்பிடத்தக்கது.