புதுச்சேரி: திருக்காஞ்சி கோவில் மாசிமக தேரோட்டம்

வில்லியனூர் அருகே உள்ள திருக்காஞ்சி கிராமத்தில் கெங்கைவராக நதீஸ்வரர் கோயில் மிகவும் பிரசித்திப்பெற்றது.  இந்த கோயிலில் ஆண்டு தோறும் மாசிமக பிரம்மோற்சவ விழா சிறப்பாக கொண்டாடப்படும்.

இந்த ஆண்டுக்கான விழா கடந்த 13-ஆம் தேதி கொடியேற்றத்துடன் தொடங்கியது. 11 நாட்கள் நடைபெறும் இந்த விழாவில் தினமும் சாமிக்கு சிறப்பு அபிஷேகம் மற்றும் தீபாராதனை நடக்கிறது. நேற்று இரவு சாமிக்கு திருக்கல்யாணம் மற்றும் ஊஞ்சல் உற்சவம் நடந்தது.

இந்நிலையில் விழாவின் 9-ம் நாளான இன்று முக்கிய நிகழ்ச்சியான தேரோட்டம் நிகழ்ச்சி நடைபெற்றது. இதையொட்டி இன்று காலை சாமிக்கு சிறப்பு பூஜை செய்து பின் உற்சவர் சிலை தேரில் எழுந்தருளினார். பின்னர் தீபாராதனை காண்பிக்கப்பட்டு, காலை 10 மணிக்கு தேரோட்டம் தொடங்கியது.

இதில் வேளாண்துறை அமைச்சர் தேனீ ஜெயக்குமார், இந்து அறநிலையத்துறை ஆணையர் சிவசங்கரன், முன்னாள் வாரியத்தலைவர் பாலமுருகன் மற்றும் பொதுமக்கள் கலந்துகொண்டு தேரை வடம் பிடித்து இழுத்தனர்.

இதில் தேர் முக்கிய வீதிகள் வழியாக சென்று மதியம் 12 மணி அளவில் கோயிலை வந்தடைந்தது. விழாவில் வில்லியனூர், புதுச்சேரி உள்பட பல்வேறு பகுதியில் இருந்து நூற்றுக்கணக்கான மக்கள் கலந்துகொண்டு சாமிதரிசனம் செய்தனர். இதனை தொடர்ந்து நாளை மாசிமக விழாவின் சிகர நிகழ்ச்சியாக கோயில் அருகே உள்ள சங்கராபரணி ஆற்றங்கரையில் தீர்த்தவாரி நிகழ்ச்சி நடக்கிறது.