APJ Abdul Kalam : ஏவுகணை நாயகன் அப்துல் கலாமின் சாதனைகள்...

ஏவுகணை நாயகரான டாக்டர் ஏ.பி.ஜே அப்துல்கலாம் இந்திய விண்வெளித்துறைக்கு மகத்தான பங்களிப்பை செய்துள்ளார். மக்களின் குடியரசுத் தலைவர் என அழைக்கப்பட்ட அவர், இந்தியாவின் 11வது குடியரசுத் தலைவராக 2002 முதல் 2007 ஆம் ஆண்டு வரை பதவி வகித்தார். குடியரசுத் தலைவர் பொறுப்புக்குப் பின் பள்ளி மற்றும் கல்லூரிகளில் எழுச்சியுரை ஆற்றி வந்தார். 2015 ஆம் ஆண்டு ஷில்லாங்கில் உள்ள இந்தியன் இன்ஸ்டிடியூட் ஆப் மேனேஜ்மென்டில் மாணவர்களிடையே உரையாடிக் கொண்டிருந்தபோது, ஜூலை 27ஆம் தேதியான இதே நாளில் காலமானார்.

அவரது நினைவுநாளையொட்டி இந்தியாவுக்காக அவர் அளித்த பங்களிப்பு மற்றும் சாதனைகளை என்னென்ன என்பதை தெரிந்துகொள்வோம்.

1. விண்வெளித்துறையில் ராக்கெட் ஏவுவது என்பது இந்தியாவுக்கு ஒரு கனவாகவே இருந்த நிலையில், அந்த குறையைப்போக்குவதில் முழு கவனத்தையும் செலுத்தினார் கலாம். எஸ்.எல்.வி (SLV) உருவாக்கியதில் முக்கியப் பங்காற்றிய அவர், அதன்மூலம் முதன் முதலாக ரோகிணி செயற்கைகோளை விண்வெளிக்கு அனுப்பி சாதனை படைத்தார். இந்த செயற்கைக்கோள் வெற்றிகரமாக விண்ணில் செலுத்தப்பட்டதன் மூலம் இந்தியாவும் முதன்முதலாக விண்வெளித்துறையில் காலடி எடுத்து வைத்து வரலாறு படைத்தது.

2. 20 ஆண்டுகளுக்கும் மேலாக இஸ்ரோவில் பணியாற்றிய பிறகு, இந்தியா பாதுகாப்புத் துறையை பலப்படுத்தும் விதமாக உள் நாட்டிலேயே ஏவுகணை உருவாக்கும் தலைமைப் பொறுப்பை ஏற்றார்.

3. அவரது தலைமையின் கீழ் அக்னி மற்றும் பிரித்வி ஏவுகணைகள் உருவாக்கப்பட்டதையடுத்து, ’இந்தியாவின் ஏவுகணை நாயகன்’ என அழைக்கப்படுகிறார்.

4. 1992 ஆம் ஆண்டு முதல் 1999 ஆம் ஆண்டு வரை பாதுக்காப்புத்துறை அமைச்சரின் அறிவியல் ஆலோசகராக செயல்பட்ட டாக்டர் ஏ.பி.ஜே அப்துல் கலாம், பொக்ரான் அணுகுண்டு சோதனையை வெற்றிகரமாக செய்து முத்திரைப் பதித்தார்.

5. பொக்ரான் 2 அணுகுண்டு சோதனைக்கு என்ஜினியராக கலாம் பணியாற்றி, அணு ஆயுத நாடுகள் பட்டியலில் இந்தியாவையும் இணைத்தார். இந்தியாவில் இருக்கும் அணு ஆயுதம் உலகில் அமெரிக்கா, சீனா, இங்கிலாந்து, பிரான்ஸ் மற்றும் ரஷ்யா ஆகிய 5 நாடுகளிடம் மட்டுமே இருக்கின்றன.

6. 1998-ல் இதயம் சம்பந்தமான டாக்டர். சோம ராஜுவுடன் சேர்ந்து ஒரு குறைந்த செலவில் கரோனரி ஸ்டென்ட் உருவாக்கினார். இது அவர்களை கெளரவப்படுத்தும் வகையில் 'கலாம்-ராஜூ ஸ்டென்ட்' என பெயரிடப்பட்டது. இந்த கருவி உருவாக்கியதற்குபிறகு கரோனரி ஸ்டென்ட் கருவிகள் இறக்குமதி செய்வது ஏறத்தாழ 50 விழுக்காடு குறைந்தது. இந்தக் கருவியின் அப்கிரேடு வெர்சன் தற்போது சந்தையில் உள்ளது.

7. ஏற்கனவே கரோனரி ஸ்டென்ட் உருவாக்கிய கலாம் - சோம ராஜூ கூட்டணி 2012 ஆம் ஆண்டில் கிராமப் புற சுகாதார பணியாளர்களுக்காக பிரத்யேகமாக டேப்லெட் ஒன்றை உருவாக்கினர். கிராமப் புற மக்கள் அவசரகாலத்தில் விரைவாக மருத்துவத்தை பெற இந்த டேப்லெட் உதவியாக உள்ளது.