பாம்பன் பாலத்தில் ரயில்கள் எப்போது இயக்கப்படும்... இந்த பாலத்தின் சிறப்புகள் என்ன?

மாவட்டம், ராமேஸ்வரம் செல்லும் ரயிகள் மண்டபம் பகுதிக்கு அருகேயுள்ள கடலுக்கு நடுவே கட்டப்பட்டுள்ள, பாம்பன் பாலம் வழியாக செல்வது வழக்கம். ஆனால், தற்போது மண்டபம் வரையில் மட்டுமே இயக்கப்படுகின்றன.

மதுரை-ராமேஸ்வரம் ரயில்வே பாதையில், மண்டபத்தில் இருந்து ராமேஸ்வரம் தீவை ரயில் மூலம் இணைப்பதற்கு பாம்பன் பாலம் கடலின் நடுவே, ஆங்கிலேயர்களின் ஆட்சிக்காலத்தின் போது அமைக்கப்பட்டுள்ளது. இது முற்றிலும் இரும்பு பொட்களால் உருவான இந்த பாலம், நூற்றாண்டை கடந்தும் செயல்பாட்டில் இருந்து வருகிறது. எனினும், உப்புத்தன்மையுடன் கூடிய கடல்காற்று, புயல் உள்ளிட்ட இயற்கை காரணங்களால் பாலம் வலுவிழந்து காணப்படுகிறது.

இந்நிலையில், சென்னை ஐ.ஐ.டி. குழுவினர் பாலத்தின் அதிர்வுகளை கண்டறியும் கருவியை பொருத்தி கண்காணித்து வருகின்றனர். இந்த கருவியில், கடந்த மாதம் 22ஆம் தேதி அளவுக்கதிகமான அதிர்வுகள் பதிவானதால் டிசம்பர் 23ஆம் தேதி முதல் பாம்பன் ரயில் பாதையில் போக்குவரத்து நிறுத்தப்பட்டது. இந்த தடை வருகிற 10ஆம் தேதிவரை தொடரும் என்று அறிவிக்கப்பட்டுள்ளது.

இந்த பாலத்தில் அதிகமான ரயில் போக்குவரத்தும் இதன் உறுதித்தன்மைக்கு அச்சுறுத்தல் என்று கணிக்கப்பட்டுள்ளது. அதிக உயரம் கொண்ட படகுகள் மற்றும் கப்பல்கள் அந்த பாதையை கடக்கும் போது பாலத்தின் நடுப்பகுதி 2ஆக பிரிந்து விடும் வகையில் வடிவமைக்கப்ட்டது.

1914ஆம் ஆண்டு முதல் இந்த பாலத்தில் மீட்டர் கேஜ் ரயில் இயக்கத்துக்கு ஏற்றார்போல, வடிவமைக்கப்பட்டது. இது 2,058 மீட்டர் நீளத்துக்கு 146 இரும்பு கர்டர்களை கொண்டு கடல் நீர் மட்டத்தில் இருந்து 3 மீட்டர் உயரத்தில் தூக்குப்பாலம் அமைக்கப்பட்டுள்ளது.

அப்போது, அதிகபட்சமாக நாள் ஒன்றுக்கு 2 ரயில்கள் மட்டும் அந்த பாலத்தை கடந்து சென்றன. பின்னர், அகலப்பாதையாக மாற்றம் செய்யப்பட்டபோது, நாள் ஒன்றுக்கு 10 க்கும் மேற்பட்ட ரயில்கள் இயக்கப்பட்டன. தற்போது வடமாநிலத்தவர்களின் வருகை மற்றம் சுற்றுலா பயணிகளின் எண்ணிக்கை அதிகரிப்பு ஆகிய காரணங்களால் ரயில்களின் எண்ணிக்கை அதிகரிக்கப்பட்டுள்ளது.

அதன்படி, மதுரை-ராமேஸ்வரம் இடையேயான பாசஞ்சர் ரயில் சேவைக்காக மட்டும் நாள்தோறும் 6 ரயில்கள் இந்த பாலத்தை கடந்து செல்கின்றன. இதனால் அதிர்வுகள் மற்றும் உப்புகாற்றை தாங்க முடியாமை ஆகிய காரணங்களால், பாலம் அடிக்கடி பழுதடைந்து, பயணிகளின் பாதுகாப்புக்கு அச்சுறுத்தலை ஏற்படுத்தவிடுகிறது.

எனவெ, ரயில்வே என்ஜினீயர்கள் குழு 24 மணி நேரமும் பாலத்தை கண்காணித்து வருகிறது. ஆயினும் பாலம் நூறு ஆண்டுகளை கடந்து விட்டதால், உறுதித்தன்மை குறைந்துள்ளது. எனவெ, வருகிற 31ஆம் தேதி வரை அந்த பாதையில் ரயில்கள் இயக்க சாத்தியமில்லை என்றும் கூறப்படுகிறது.

ரயில்வே வாரியத்தின் தொழில்நுட்ப அறிவுரை மற்றும் ஆலோசனை குழுவான ஆராய்ச்சி மற்றும் வளர்ச்சி பிரிவின் (RDSO) நேரடி மேற்பார்வையில் பாலத்தின் பழுதுகள் சரிசெய்யப்பட்டு, பாதுகாப்பாக ரயில்கள் இயக்குவதற்கான பணிகள் தீவிரமாக நடந்து வருகின்றன. இந்நிலையில், ஏற்கனவே ராமேஸ்வரம் வரை ரயிலில் முன்பதிவு செய்த பயணிகள், அரசு போக்குவரத்து கழகம் மூலம் சென்று வர ஏற்பாடு செய்யப்பட்டுள்ளது.

இதற்கிடையே, புதிய தொழில்நுட்பத்தில், புதிதாக பாம்பன் பாலம் ஒன்று அருகிலேயே கட்டப்பட்டு வருகிறது. இதன் கட்டுமான பணிகளில் 84 சதவீதம் முடிந்துள்ள நிலையில், இந்த புதிய பாலம் நவீன தொழில்நுட்பத்தில், கடலின் நடுவே லிப்டு போல செயல்படும் வகையில் வடிவமைக்கப்படுகிறது.

மேலும், ரயில்வே மின் பாதை மற்றும் இரட்டை அகலப்பாதைக்கு ஏற்றால்போலவும் கட்டப்பட்டு வருகிறது. இந்த பணிகள் இந்த ஆண்டு (2023) மார்ச் மாதத்திற்குள் முடிக்க திட்டமிடப்பட்டிருந்த நிலையில், பணிகள் அனைத்தும் செப்டம்பர் மாதத்தில் தான் முடிவடையும் என்று சொல்லப்படுவது குறிப்பிடத்தக்கது.