ராமநாதபுரம் மாவட்டத்தில் சுற்றுலா பயணிகள் மிஸ் பண்ணக்கூடாத தனுஷ்கோடி... ஏன் தெரியுமா?

மாவட்டம் ராமேஸ்வரத்திற்கு அருகில் இருக்கும் தனுஷ்கோடி கடலும், காற்றும், அழகும் கொண்ட சுற்றுலா தலமாக இருந்து வருகிறது. இது சுற்றுலா பயணிகள் தவறாமல் பார்த்து, உணர்ந்து அறிய வேண்டிய இடமாகும்.

தனுஷ்கோடி கண்களைக் கவரும் அழகிய சுற்றுலா தலமாக திகழ்கிறது. ஒருபுறம் பாக்ஜலசந்தி, மறுபுறம் மன்னார் வளைகுடா, கடலுக்கு நடுவில் சாலை என இதன் அழகு மனதை கொள்ளை கொள்ளும்.

குழந்தைகள் முதல் பெயரிவர்கள் வரை அனைவரும் வயது வித்தியாசம் இன்றி கடலை ரசித்து மகிழலாம். இங்கே செல்லும்போது, பெரியவர்களும் குழந்தைபேல் மாறிவிடுவதைப் பார்க்க முடியும். கடல் அலையின் சத்தடும், காற்றின் ரீங்காரமும் உங்களை மெய்மறக்கச் செய்யும்.

2016ஆம் ஆண்டுக்கு முன்னர், தனுஷ்கோடி கம்பிப்பாடு-அரிச்சல்முனை இடையே சென்றுவருவதற்கு சாலை வசதிகள் இல்லாமல் இருந்த நிலையில், அங்கே புதிதாக சாலை போடப்பட்டது. அதன் பின்னர் சுற்றுலா பயணிகளின் வருகை நாளுக்கு நாள் அதிகரித்து வருகிறது.

இது விடுமுறை நாட்களில் ஆயிரக்கணக்கானோர் சென்று வரும் முக்கிய சுற்றுலா தலமாக இருந்து வருகிறது. ராமேஸ்வரத்துக்கு ஆன்மீக சுற்றுலா பயணம் வரும் ஏராளமான சுற்றுலா பயணிகள் இங்கே வந்து செல்வதை வாடிக்கையாகக் கொண்டுள்ளனர். இவ்வாறு உற்சாகம் தரும் இந்த பகுதி மாபெரும் சோகத்தையும் சுமந்தபடி காட்சியளிக்கிறது.

1964ஆம் ஆண்டு டிசம்பர் மாதம் 23ஆம் தேதி நள்ளிரவு தாக்கிய கோரப்புயலால், இந்திய தேசத்தின் வரைபடத்தில் இருந்து தனுஷ்கோடி துறைமுகமே காணாமல் போயிற்று. தனுஷ்கோடியிலிருந்த வீடுகள், பெரிய பெரிய கட்டடங்கள், கோவில், சர்ச், இஸ்லாமியர்களின் அடக்கஸ்தலம் என அனைத்தும் இடிந்து விழுந்தன.

வரலாற்றில் பிரதான இடம் பிடித்த தனுஷ்கோடி, 1964 புயலுக்கு பின்னர் மனிதர்கள் வசிக்க தகுதியற்ற இடமாக மாறிப்போனது. அந்த நிலை இன்று வரை நீடிக்கிறது. இன்று சிதிலமைடைந்த வீடுகள், உயிருள்ள மனிதர்களை இழந்து வெறும் கூடுகளாய் காட்சியளிக்கின்றன.

பாம்பன் - தனுஷ்கோடி பாசஞ்சர் ரயிலை கடல் சுருட்டி இழுத்து கவிழ்த்தது. இதனால், அதில் பயணித்த 100-க்கும் மேற்பட்டோர் கடலில் மூழ்கி உயிரிழந்தனர். அழிந்து போன வணிக நகரான தனுஷ்கோடி, தற்போது புயலின் எச்சங்களாக நினைவுச் சின்னங்களைப்போல் காட்சியளிக்கிறது. இதை பார்க்கும் சுற்றுலா பயணிகள் அதன் வரலாற்றையும் தெரிந்து கொண்டு திரும்புவது நல்லது.