மதமென பிரிந்ததுபோதும்... இஸ்லாமிய பெண்கள் கொண்டாடிய பொங்கல் விழா.. ராமநாதபுரத்தில் நெகிழ்ச்சி

தமிழர் திருநாளாம் தைப்பொங்கல் இன்று சிறப்பாக நாடு முழுவதும் கொண்டாடப்படுகிறது.

இந்நிலையில் ராமநாதபுரம் அம்பலகாரர் தெருவில் பாத்திமா மகளிர் சுய உதவி குழு சார்பில் தலைவி ஆபிதா பானு தலைமையில் 25க்கும் மேற்பட்ட முஸ்லிம் பெண்கள் சமத்துவ பொங்கல் வைத்து தைப்பொங்கலை கொண்டாடி மகிழ்ந்தனர்.

உழவர் திருநாளாம் பொங்கல் திருநாளை இந்துக்கள் மட்டும் பொங்கல் வைத்து கொண்டாடுகின்றனர் என்று பலர் நினைத்துக் கொண்டிருக்கின்றனர்.

இந்த சூழ்நிலையில் பாத்திமா மகளிர் சுய உதவி குழு சார்பில் தமிழர்களின் திருநாளாம் இந்த பொங்கல் திருநாளில் இஸ்லாமிய பெண்கள் அனைவரும் சேர்ந்து சமத்துவ பொங்கல் வைத்து கொண்டாடியது மிகவும் மகிழ்ச்சியாகவும், சந்தோசமாகவும் இருப்பதாகவும் தெரிவித்தனர்.

இதுகுறித்து முஸ்லிம் பெண்கள் கூறுகையில், “இந்துக்கள், முஸ்லிம்கள், கிறிஸ்தவர்கள் என மும்மதத்தினரும் சேர்ந்து சமத்துவ பொங்கல் கொண்டாடி வருகிறோம்.

இந்துக்கள் எப்படி காலையிலிருந்து கோலமிட்டு பொங்கல் வைத்து கொண்டாடுகிறார்களோ அதேபோல் முஸ்லிம் பெண்களும் அதிகாலையில் எழுந்து எங்களது வீடுகளில் கோலமிட்டோம்.

பொங்கல் வைத்து விட்டு அதன்பின் இந்த சமத்துவ பொங்கல் கொண்டாடி வருவது மன மகிழ்ச்சியாக இருப்பதாக” தெரிவித்தனர்.