ராமநாதபுரம் மாவட்டத்தில் 200 ஆண்டுகளாக விளைவிக்கப்படும் முண்டு மிளகாய்க்கு புவிசார் குறியீடு - இதன் சிறப்புகள் தெரியுமா?

பொருட்களுக்கான புவிசார் குறியீடுகள் சட்டம் 1999ஆம் ஆண்டு நிறைவேற்றப்பட்டு, பின்னர் 2003ஆம் ஆண்டு முதல் நடைமுறைக்கு வந்தது. அதன்படி, ஒரு குறிப்பிட்ட இடத்தை சேர்ந்த தனித்தன்மை வாய்ந்த பொருட்களுக்கு புவிசார் குறியீடு அளிக்கப்படுகிறது.

இந்த குறியீடுகள் மூலம் அந்த பொருளின் பிறப்பிடத்தை அறியவும், சம்பந்தப்பட்ட பொருளை, வேறு யாரும் வியாபார நோக்கத்துக்காகவோ, போலியாகவோ பயன்படுத்துவதை சட்டப்பூர்வமாக தடுக்கவும் இது வழிவகை செய்கிறது.

அந்த வகையில், தமிழகத்தில் தஞ்சாவூர் தலையாட்டி பொம்மை, மதுரை மல்லிைக, காஞ்சீபுரம் பட்டு, திண்டுக்கல் பூட்டு, மணப்பாறை முறுக்கு, ஸ்ரீவில்லிபுத்தூர் பால்கோவா போன்ற 43 பொருட்களுக்கு புவிசாா் குறியீடு வழங்கப்பட்டுள்ளன.

இப்போது, ராமநாதபுரம் மாவட்டத்தில் வறட்சியை தாங்கி வளரும், 200 ஆண்டுகளாக விளைவிக்கப்படும் முண்டு மிளகாய் எனப்படும் குண்டு மிளகாய்க்கு தனிச்சிறப்பு இருக்கிறது. வறட்சியை தாங்குவதே இந்த முண்டு மிளகாயின் தனித்தன்மைகளுள் முக்கியமானது. இது கமுதி, கடலாடி, முதுகு ளத்தூா், பரமக்குடி, நயினாா் கோவில், ஆா்.எஸ்.மங்கலம் பகுதிகளில் அதிக அளவில் விளைவிக்கப்படுகிறது.

பொதுவாக புவிசார் குறியீடு பெற விண்ணப்பித்து, 4 மாத காலத்திற்குள் யாரும் ஆட்சேபனை தெரிவிக்கவில்லை எனில் புவிசார் குறியீடு வழங்கப்பட்டுவிடும். அந்த வகையில் கடந்த 21ஆம் தேதியுடன் காலக்கெடு முடிவடைந்து நிலையில், யாரும் ஆட்சேபனை தெரிவிக்கவில்லை. எனவே, புவிசார் குறியீடு வழங்கப்பட்டுள்ளது.

பல ஆண்டுகளாக முயற்சிக்கு பின்னர் ராமநாதபுரம் முண்டு மிளகாய் புவிசார் குறியீடு அளிக்க நறுமண பொருட்கள் வாரியத்துக்கு பரிந்துரை செய்யப்பட்டு, தற்போது புவிசார் குறியீடு கிடைத்துள்ளதாக விவசாயிகள் கூறுகின்றனர்.

இந்த வகை மிளகாய்க்கு உலக அளவில் சந்தை வாய்ப்பு இருந்து வருகிறது. இத்தகையி தனிச்சிறப்பு வாய்ந்த ராமநாதபுரம் முண்டு மிளகாய்க்கு புவிசார் குறியீடு கிடைத்திருப்பது விவசாயிகள் மத்தியில் மகிழ்ச்சியை ஏற்படுத்தியுள்ளது.