சூறைக்காற்றின் காரணமாக மன்னார் வளைகுடா பகுதியில் மீன் பிடிக்கச் செல்ல தடை- மீனவர்கள் பாதிப்பு

மன்னார் வளைகுடா கடலில் வீசும் சூறைக்காற்றினால் பாம்பன் பகுதி மீனவர்களுக்கு மீன்பிடி துறைமுகத்தில் இருந்து மீன்பிடிக்கச் செல்லும் அனுமதி சீட்டு ரத்து செய்யப்பட்டுள்ளது.

அதனால், மீனவர்களின் வாழ்வாதாரம் பாதிக்கப்படும் சூழ்நிலை உருவாகியுள்ளது.

தமிழக கடலோர பகுதிகளில் வீசும் தென்மேற்கு பருவக்காற்றால் குமரிக்கடல், தென் தமிழகப் பகுதிகளில் 40 முதல் 50 கி.மீ வேகத்தில் பலத்த காற்று வீசுகிறது.

இதனால் மீன்பிடிக்கக் கடலுக்கு செல்ல வேண்டாம் என மீனவர்களுக்கு சென்னை வானிலை ஆய்வு மையம் கூறியுள்ளது.

இந்நிலையில், ராமேஸ்வரம் தீவு பகுதியில் உள்ள பாம்பன் மீன்வர்கள் மீன்பிடிக்க செல்லும் மன்னார் வளைகுடாவில கடல் சீற்றத்துடன் சூறைக்காற்று வீசுவதால் பாம்பன் விசைப்படகு மீனவர்களுக்கு மீன்பிடி அனுமதி சீட்டு ரத்து செய்யப்பட்டுள்ளது. இதனால் பாம்பன் விசைப்படகு மீனவர்கள் மீன்பிடிக்க செல்லவில்லை.

மேலும் மறு உத்தரவு வரும் வரை மீனவர்கள் யாரும் கடலுக்கு செல்ல வேண்டாம் என்றும் கரையோரங்களில் மீன்பிடிக்கும் சிறு நாட்டுப்படகு மீனவர்களும் பாதுகாப்பான முறையில் மீன் பிடித்து கரை திரும்பவும் என்றும் மீன்வளத்துறை அதிகாரிகள் வெளியிட்டுள்ள அறிக்கையில் அறிவுறுத்தபட்டுள்ளது.

பாம்பன் பகுதியில் 93- க்கும் அதிகமான விசைப் படகுகள் கடற்கரையில் நங்கூரமிட்டு நிறுத்தப்பட்டுள்ளது. இதனால் மீனவர்களின் வாழ்வாதாரம் பெருமளவில் பாதிப்படைகிறது.

மீன்பிடி தடைக்காலம் முடிந்து ஒரு மாத காலம் கூட ஆகாத நிலையில் தற்போது மீன்பிடிக்க தடையால் சுமார் 10 ஆயிரத்திற்கும் மேற்பட்ட மீனவர்கள் நேரடியாகவும் 50 ஆயிரத்திற்கும் மேற்பட்ட மீன்பிடி சார்பு தொழிலாளர்களும் வேலை இழக்கும் சூழல் ஏற்பட்டு மீனவர்கள் வாழ்வாதாரம் பாதிப்பதாக கவலை தெரிவிக்கின்றனர்.

ராமேஸ்வரம் கடலில் நிற்கும் விசைப்படகுகள்