விஜய்சேதுபதி பட சூட்டிங் ஸ்பாட் இதுதானா! - அட இது நம்ம புதுக்கோட்டையில தாங்க இருக்கு! 

மாவட்டம் பொன்னமராவதிக்கு அருகே பூலாங்குறிச்சி என்ற இடத்தில் இருக்கிறது மலைகளுக்கு நடுவே அமைந்துள்ள காஞ்சாத்துமலை முருகன் கோவில். இங்கு விஜய்சேதுபதி நடித்த படத்தின் பல காட்சிகள் எடுக்கப்பட்டுள்ளன.

இந்த காஞ்சாத்துமலை சுப்பிரமணியன் சுவாமி கோவில் புதுக்கோட்டையில் இருந்து 33 கி.மீ. தொலைவிலும், பொன்னமராவதியில் இருந்து 8 கி.மீ. தொலைவிலும் அமைந்துள்ளது. இதில் பாறையிலேயே படிக்கட்டுகள் அழகாகவும், நேர்த்தியாகவும் செதுக்கப்பட்டுள்ளன.

காஞ்சாத்துமலை உச்சியில் இருக்கிறது முருகன் கோவில். அங்கிருந்து சுற்றியுள்ள பசுமைபோர்த்திய மலைகளை பார்ப்பதற்கு மிகவும் அழகாக இருக்கும். படியேறி வந்த களைப்பு இந்த இயற்கை அழகில் காணாமல் போய்விடும்.

இந்த காஞ்சாத்துமலை முருகன் கோவில் 500 ஆண்டுகள் பழமையானது என்று சொல்கிறார்கள். இங்கு வரும் சுற்றுலா பயணிகள் தண்ணீர், உணவு ஆகியவற்றை கையோடு கொண்டு வருவது நல்லது. ஏனென்றால் இங்கே கடைகள் எதுவும் இருக்காது.

இந்த மலையின் ஓர் பகுதியில், சிவன் கோவில், அம்மன் கோவில் மற்றும் விநாயர் கோவில் ஆகியவை அருகருகே உள்ளன. அதற்கு அருகில் கல்லிலேயே செதுக்கப்பட்ட ராங்கியம் சிலை அழகாக காட்சியளிக்கிறது.

இந்நிலையில், விஜய்சேதுபதி, ஐஸ்வர்யா நடித்த ரம்மி படத்தில் வரும் பல காட்சிகள் இங்குதான் எடுக்கப்பட்டன. அதில் வரும் ‘கூடமேல கூடவச்சி’ பாடலில் இந்த காஞ்சாத்துமலையை பல கோணங்களில் காட்டியிருப்பார்கள்.

அந்த மலையில் இருக்கும் சுனை (பாறையில் நீர் தேங்கி இருக்கும் இடம். இதனை பாழி என்றும் கூறுவார்கள்) பகுதியிலும் இந்த பாடலின் சில காட்சிகளை எடுத்திருப்பார்கள்.

அதே படத்தில், காயத்திரியும், அவர் தங்கையும் மலை மேல் இருக்கும் கோவிலுக்கு போட்டி போட்டுக்கொண்டு ஓடி வருவார்கள். பின்னர், தங்கையின் காதை பிடித்து திருகும் காட்சி இங்கிருக்கும் முருகன் கோவிலில்தான் ஷூட் செய்யப்பட்டிருக்கும்.

இதனைத்தொடர்ந்து காயத்திரிக்கு லவ் டார்ச்சர் கொடுக்கும் நபரை எச்சரிக்கும் காட்சியும் இந்த காஞ்சாத்துமலை முருகன் கோவிலிலுக்கு அருகில் உள்ள பாறையில்தான் எடுக்கப்பட்டிருக்கும். சுற்றுலா பயணிகளும், சினிமா ஆர்வலர்களும் தவறாமல் பார்க்க வேண்டிய முக்கியமான இடம் இந்த காஞ்சாத்துமலை. இந்த மலையின் அழகும், இயற்கையும், சில்லென்று வீசும் காற்றும் உங்களை பரவசப்படுத்த காத்துக்கொண்டிருக்கின்றன.