திருப்பதிக்கு நிகராக போற்றப்படும் கோவில் - புதுக்கோட்டை மலையடிப்பட்டி குடைவரைக்கோவிலின் சிறப்புகள்!

மாவட்டத்தில் அமைந்திருக்கிறது அழகிய கிராமமான மலையடிப்பட்டி. இது கீழையூா் பஞ்சாயத்தில் புதுக்கோட்டையிலிருந்து 33 கி.மீ. தூரத்திலும் கீரனூரில் இருந்து 15 கி.மீ. தொலைவிலும் அமைந்துள்ளது.

இந்த மலையடிப்பட்டியில் சிவபெருமானுக்கும், விஷ்ணு பெருமானுக்கும் தனித்தனியே இரண்டு குகைக் கோவில்கள் உள்ளன. இரண்டு கோவில்களும் அருகருகே ஒரே குன்றின் மீது தனித்தனியாக அமைக்கப்பட்டிருப்பது தனிச்சிறப்பு.

இங்கே, அனந்தசயன மூர்த்தியாகக் காட்சியளிக்கும் பெருமாள் கோவிலானது திருப்பதிக்கு நிகரானதாக பார்க்கப்படுகிறது. இந்த விஷ்ணு கோவிலானது, இங்குள்ள சிவன் கோவிலுக்கு காலத்தால் சற்று பிந்தையதாகும்.

கி.பி 730ஆம் ஆண்டில் நந்திவர்ம பல்லவன் காலத்தில் மலையைக் குடைந்து சிவ பெருமானுக்கு குடைவரைக் கோவிலை அமைந்து அதற்கு வாகீஸ்வரர் என்று பெயரிட்டு போற்றி வந்ததை அங்கிருக்கும் கல்வெட்டு ஒன்றின் குறிப்பு சொல்கிறது.

இந்த கோவிலில் இருக்கும் கருவறையை அடுத்து அர்த்த மண்டபம் உள்ளது. இந்த மண்டபத்தைக் சுவற்றில் வீரபத்திரர், சிவன், விஷ்ணு உள்ளிட்டோரின் புடைப்பு சிற்பங்கள் காணப்படுகின்றன. மேலும், எருமையின் முகமும், மனித உடலும் கொண்ட மகிஷாசுரனுடன், மகிஷாசுரமத்தினி சிங்கத்தின்மீது அமர்ந்து அரக்கனை வீழ்த்துவது போன்ற காட்சிகள் தத்ரூபமாக வடிக்கப்பட்டுள்ளன.

விஷ்ணுவின் குகைக் கோவிலானது கருவறையையும், ஒரு மண்டபத்தையும் கொண்டு அழகாக காட்சியளிக்கிறது. கருவறையில் திருமால் அனந்த சயன மூர்த்தியாகக் காட்சியளிக்கிறார். மண்டபத்தின் சுவற்றில் வராகமூர்த்தி, நரசிம்மர், தேவியருடன் திருமால் சிற்பங்கள் செதுக்கப்பட்டுள்ளன.

இந்த குகைக் கோவிலில் இயற்கை வண்ணங்களால் வரையப்பட்ட ஓவியங்கள் காலத்தால் மிகவும் பிற்பட்டதாகும்.

இங்குள்ள கண் நிறைந்த பெருமாள் திருவனந்தபுரத்தில் இருக்கும் பத்மநாப சுவாமிக்கு நிகரானவர் என்று கருதப்படுகிறார். இங்கே வேண்டிக் கொண்டால் கண்பார்வை தொடர்பான நோய்கள் நீக்கும் என்பது பக்தர்களின் நம்பிக்கை.

வரலாற்று சிறப்புமிக்க இந்த குடைவரைக் கோவிலை பார்க்க உலகின் பல்வேறு பகுதிகளில் இருந்து சுற்றுலா பயணிகளும் வரலாற்று ஆர்வலர்களும் அதிக எண்ணிக்கையில் வந்து செல்கின்றனர்.