அவதார் கேரக்டர்களாக மாறிய தியேட்டர் ஊழியர்கள்.. புதுச்சேரியில் சுவாரஸ்யம்!

புதுச்சேரியில் ரசிகர்களை கவர அவதார் பட கதாபாத்திரங்கள் போல் தியேட்டர் ஊழியர்கள் வேடம் அணிந்துள்ளனர்.

ஜேம்ஸ் கேமரூன் இயக்கத்தில் 2009ல் வெளிவந்து உலக அளவில் சினிமா ரசிகர்களை வியக்க வைத்த ஒரு படம் 'அவதார்'. இப்படி ஒரு சயின்ஸ் - பிக்ஷன் படமா என படத்தைப் பார்த்து அப்போது வியக்காதவர்களே இல்லை.

அப்படத்தின் இரண்டாம் பாகமான 'அவதார் - தி வே ஆப் வாட்டர்' படம் கடந்த 2 நாட்களுக்கு முன்பு வெளியானது. இந்த படத்தை தமிழிலும் டப்பிங் செய்து வெளியிட்டுள்ளார்கள்.

குழந்தைகள் முதல் பெரியவர்கள் வரை அனைவரையும் கவர்ந்து வரும் இந்த படத்தை காண ஏராளமானோர் திரையரங்குகளில் குவிந்து வருகின்றனர்.

புதுச்சேரி-கடலூர் சாலையில் உள்ள வணிக வளாகத்தில் தனியார் திரையரங்கம் ஒன்று செயல்பட்டு வருகிறது. இந்த திரையரங்கத்தில் பணிபுரியும் ஊழியர்கள் படம் பார்க்க வரும் ரசிகர்களை கவரும் வகையில் அவதார் படத்தில் வரும் கதாபாத்திரங்கள் போல் வேடம் அணிந்து ரசிகர்களை வரவேற்கின்றனர்.

இதனை கண்டு மகிழ்ச்சியடைந்த ரசிகர்கள், அவதார் போல் வேடமணிந்தவர்களுடன் புகைப்படம் எடுத்து மகிழ்ந்தனர்.