ஆரம்பிக்கலாமா.. புதுச்சேரியில் புத்தாண்டு கொண்டாட்டத்திற்காக தயாராகும் புது புது உணவுகள்..!

புதுச்சேரியில் நாளை புத்தாண்டு கொண்டாடப்படவுள்ள நிலையில், இன்று இரவு வரும் மக்களுக்காக நட்சத்திர ஹோட்டல்கள், ரிசார்ட்டுகள் என அனைத்து இடங்களிலும் விதவிதமாக உணவுகள் தயாராகவுள்ளன.

புதுச்சேரியில் 20க்கும் மேற்பட்ட நட்சத்திர ஹோட்டல்கள், 25க்கு மேற்பட்ட பீச் ரிசார்ட்டுகள் உள்ளன. இவை மட்டுமன்றி 1000த்திற்கும் மேற்பட்ட சிறிய விடுதிகள் உள்ளன.இவை  அனைத்திலும் புத்தாண்டிற்கு விதவிதமான நிகழ்வுகளும் உணவுகளும் தயாராக உள்ளன.

அதே வேளையில் நகரில் உள்ள 500க்கும் மேற்பட்ட  சாலை உணவகங்களும் சுற்றுலா பயணிகளை வரவேற்க உள்நாட்டு உணவுகள்  மட்டுமல்லாது  வெளிநாட்டு  உணவு வகைகளையும் மக்களுக்கு வழங்க தயாராகி வருகின்றது. குறிப்பாக பட்டேல் சாலை, மிஷன் வீதி, புஸ்சி வீதி, ஆம்பூர் சாலை, சுப்பையா சாலை ஆகியவற்றில் சிறிய ரக உணவகங்கள் மற்றும் சாலையோர கடைகளில் சுட சுட கிடைக்கும் உணவுகளை ரசிக்க பெரும் கூட்டமே இருக்கிறது.

வழக்கமான இட்லி, தோசை மீன் குழம்புடன், நூடுல்ஸ், பிரைய்டு ரைஸ் என்பதையெல்லாம் தாண்டி மலேசியா புகழான நாசி கொரியன்  இக்காம் ப்ளீஸ்(NASI GORENG BILIS) நாசி பத்தாயா(NASI PATTAYA) இந்தோனேசியாவை சேர்ந்த மீ  கொரியின்(MEE GORENG) மேகி கொரியன்(MEE GORENG), அமெரிக்கன் உணவான  கிரிஸ்பி பிராண், கிரிஸ்பி  விங்க்ஸ் உட்பட அனைத்து உணவு வகைகளும் இங்கு கிடைக்கிறது. ரசாயன கலப்பில்லாத உணவுகள் இங்கு தயாராவதாக பெருமையுடன் உணவக உரிமையாளர் சதீஷ் தெரிவிக்கின்றனர்.

இவை மட்டுமல்ல நடுத்தர உணவகங்களில் பிரெஞ்சு உணவு வகைகளும் வரவேற்க காத்திருப்பதாகவும் உணவக உரிமையாளர்கள் சங்க துணை தலைவர் கிருஷ்ணபிரதாப், செயலாளர் ஆடலரசன் ஆகியோர் தெரிவித்தனர். இந்த உணவு வகைகளுடன் புத்தாண்டு கொண்டாட தயாராகி வரும் புதுச்சேரி விழாக்கோலம் பூண்டிருக்கிறது.