மாண்டஸ் புயல்..! சிறும் கடல்.. எப்படி எதிர்க்கொள்கிறது புதுச்சேரி?

தென்மேற்கு வங்க கடலில் உருவாகியுள்ள மான்டஸ் புயலானது தற்போது தீவிரப் புயலாக கரையை நோக்கி வந்து கொண்டிருக்கிறது. க்கு தெற்கு தென்கிழக்கு 270 கிலோமீட்டர் தொலைவிலும் காரைக்காலுக்கு கிழக்கே தென்கிழக்கே 190 கிலோமீட்டர் தொலைவிலும் புயலானது நிலை கொண்டுள்ளது.

இந்த புயலானது புதுச்சேரி - ஸ்ரீஹரிகோட்டா இடையே கரையை கடக்கும் என வானியல் ஆய்வு மையம் தெரிவித்துள்ள நிலையில், புதுச்சேரி துறைமுகத்தில் 5 ஆம் எண் புயல் எச்சரிக்கை கூண்டு ஏற்றப்பட்டுள்ளது. புயலானது 12 கிலோமீட்டர் வேகத்தில் தற்போது கரையை நோக்கி வந்து கொண்டிருக்கிறது.

இதனிடையே மாண்டஸ் புயல் காரணமாக புதுச்சேரியில் கடல் வழக்கத்திற்கு மாறாக சீற்றத்துடன் காணப்படுகிறது. கடல் அலைகள் இரண்டு மீட்டர் உயரம் வரை ஆர்பரித்து கரையை நோக்கி வருகிறது.

மேலும் மாண்டஸ் புயல் நெருங்கி வரும் நிலையில், புதுச்சேரியில் ஒருசில இடங்களில் லேசான மழை பெய்யத் தொடங்கியுள்ளது.

புயல் எச்சரிக்கை காரணமாக மீனவர்கள் அனைவரும் தங்களது படகுகளை தேங்காய்திட்டு மீன்பிடி துறைமுகத்தில் பாதுகாப்பாக நிறுத்தி வைத்துள்ளனர்.

புயல் மற்றும் மழை பாதிப்புகளை சீரமைக்கும் வகையில் புதுச்சேரியில் இரண்டு தேசிய பேரிடர் மீட்பு குழுவினர் வருகை தந்து முகாமிட்டுள்ளனர்.

பொது மக்கள் மற்றும் கல்லூரி பள்ளி மாணவர்கள் சிரமத்தை போக்கும் வகையில் இன்று மற்றும் நாளை பள்ளி மற்றும் கல்லூரிகளுக்கு விடுமுறை அளிக்கப்பட்டுள்ளது.

தரைக்காற்று அதிகமாக வீசி வருவதால் புதுச்சேரியின் பல்வேறு பகுதிகளில் மின்சாரம் துண்டிக்கப்பட்டுள்ளது.