“கேஸ் சிலிண்டருக்கு ரூ.300 மானியம்..”- அதிரடி அறிவிப்பு வெளியிட்ட முதலமைச்சர் ரங்கசாமி

புதுச்சேரியில் அனைத்து அட்டைதாரர்களுக்கும் சமையல் எரிவாயு சிலிண்டருக்கு மாதம் 300 ரூபாய் மானியம் வழங்கப்படும் என முதலமைச்சரும் நிதி அமைச்சருமான ரங்கசாமி அறிவித்துள்ளார்.

புதுச்சேரி சட்டமன்ற பட்ஜெட் கூட்டத் தொடர் கடந்த 9 ம் தேதி காலை துணை நிலை ஆளுநர் தமிழிசை சௌந்தரராஜன் உரையுடன் தொடங்கியது. இன்று முதலமைச்சரும் நிதி அமைச்சருமான ரங்கசாமி முழு பட்ஜெட் தாக்கல் செய்தார்.

இன்று தாக்கல் செய்த பட்ஜெட்டில் மாணவர்களுக்கு சிபிஎஸ்சி பாடத்திட்டம், இலவச மடிக்கனிணி, மாலையில் சிறுதானிய சிற்றுண்டி, முதியோருக்கு ஓய்வூதியம் அதிகரிப்பு போன்ற பல கவர்ச்சியான அறிவிப்புகள் இடம்பெற்றிருந்தன.

மேலும் சுனாமி நினைவிடம், கடலுக்கடியில் பூங்கா, பிளாஸ்டிக் பாட்டில்களை நொறுக்கும் கருவிகள் போன்ற திட்டங்களும் இடம்பெற்றிருந்தன. இதையடுத்து அனைத்து ரேஷன் கார்டுகளுக்கும் சமையல் எரிவாயு சிலிண்டருக்கு மாதம் 300 ரூபாய் மானியம் வழங்கப்படும் என முதலமைச்சர் ரங்கசாமி அறிவித்தார். இந்த அறிவிப்பு அம்மாநில மக்களை மகிழ்ச்சியில் ஆழ்த்தியுள்ளது.

பட்ஜெட் தாக்கல் செய்த பிறகு, அவை நடவடிக்கையை சபாநாயகர் செல்வம் நாளை வரை ஒத்திவைத்தார். 12 ஆண்டுகளுக்குப் பிறகு புதுச்சேரியில் முழு பட்ஜெட் தாக்கல் செய்யப்படுவது குறிப்பிடத்தக்கது.