தெலுங்கில் சில்வர் ஜுப்லியாக அமைந்த கமல், ஸ்ரீதேவி ஜோடியின் கடைசிப் படம்

கமல், ஸ்ரீதேவி தமிழில் திரையுலகின் மறக்க முடியாத ஜோடி. இவர்கள் இணைந்து நடித்திருக்கிறார்கள் என்பதற்காகவே படம் பார்க்க வந்த ரசிகர்கள் இருக்கிறார்கள். இதுபோல் ராசியான, கெமிஸ்ட்லி அமைந்த ஜோடிகள் திரையுலகில் குறைவு.

16 வயதினிலே, மூன்றாம் பிறை, குரு, வாழ்வே மாயம், சிவப்பு ரோஜாக்கள் என கமல் - ஸ்ரீதேவி இணை தமிழில் பல சில்வர் ஜுப்லி படங்கள் தந்திருக்கிறது.

அவர்கள் கடைசியாக இணைந்து நடித்தது ஓர் தெலுங்குப் படம். பெயர், ஒக ராதா இத்தரு கிருஷ்ணலு.

தெலுங்கின் பிரபல இயக்குனர் கோதண்டராம ரெட்டி ஒக ராதா இத்தரு கிருஷ்ணலுபடத்தை எழுதி இயக்கினார். இதன் கதை பிரபல நாவலாசிரியர் எண்டமூரி வீரேந்திரநாத் எழுதிய நாவலைத் தழுவி எழுதப்பட்டது. இளையராஜா இசையமைத்திருந்தார்.

படத்தின் ரொமான்டிக் நகைச்சுவை வொர்க் அவுட்டாக, தெலுங்கு ரசிகர்கள் ஆர்வமுடன் படத்தைப் பார்த்தனர். இதில் ஒரு விசேஷம், எண்டமூரி வீரேந்திரநாத்தின் நாவலைத் தழுவி கோதண்டராம ரெட்டி இயக்கிய ராக்ஷஸடு என்ற படமும், கமல் படம் வெளியான அதே நாளில் வெளியானது. இரண்டுப் படங்களுக்கும் இளையராஜாதான் இசை. இதில் சிரஞ்சீவி, ராதா நடித்திருந்தனர்.

ஒக ராதா இத்தரு கிருஷ்ணலு படம் ஆந்திராவில் 175 நாள்களுக்கு மேல் ஓடி வெள்ளி விழா கண்டது. இந்தப் படத்தை தமிழில் 'டப்' செய்து, ஹரோ ராதா ஹரே கிருஷ்ணா என்ற பெயரில் கமலின் ராஜ் கமல் பிலிம்ஸ் இன்டர்நேஷனல்ஸ் வெளியிட்டது.

அதேபோல் சிரஞ்சீவி படமும் தமிழில் ராட்சஸன் என்ற பெயரில் மொழிமாற்றம் செய்யப்பட்டு வெளியானது.

ஹரோ ராதா ஹரே கிருஷ்ணா தமிழில் பரவலாக ஓடியது. கமலின் இளம் ரசிகைகளின் மனம் கவர்ந்த படமாக அது அமைந்தது. இளையராஜாவின் இசையில் கமல் ஒரு பாடல் பாடியிருந்தார். பாடல்கள் படத்தின் பலமாக அமைந்தன.

கமல் - ஸ்ரீதேவி காதல் காட்சிகளுக்கு இன்றும் இந்தப் படம் உதாரணமாக உள்ளது. எண்டமூரி விரேந்திரநாத்தின் கதையும் வெற்றிக்கு முக்கிய காரணம்.

எண்டமூரி வீரேந்திர நாத் எழுதிய நாவலைத் தழுவி ஒரே பேனரில் மூன்று படங்கள் செய்தார் கோதண்டராம ரெட்டி. இந்த மூன்றுப் படங்களுக்கும் இளையராஜாதான் இசையமைத்தார். அதில் ஒன்றுதான் கமல், ஸ்ரீதேவி நடித்தது.

எண்டமூரி வீரேந்திரநாத்தின் நாற்பதுக்கும் மேற்பட்ட நாவல்கள் படமாகியுள்ளன. சிரஞ்சீவி, நாகார்ஜுனா போன்ற முன்னணி நடிகர்கள் அதில் நடித்துள்ளனர். கமலும் நடித்துள்ளார்.

இவரது நாவல்கள் தமிழில் மொழிபெயர்க்கப்பட்டு அமோகமாக விற்பனையாகின்றன. அவருக்கு தமிழில் கணிசமான வாசகர்கள் உள்ளனர்.

ஒக ராதா இத்தரு கிருஷ்ணலு திரைப்படம் 1986, அக்டோபர் 2 வெளியானது. படம் நேற்றுடன் 36 வருடங்களை நிறைவு செய்தது.