ஊட்டியில் இப்படி ஒரு அருவி இருப்பதே பலருக்கும் தெரியாது! - அதிகம் பிரபலமில்லாத அட்டகாசமான சுற்றுலா இடங்கள்!

மலைகளின் இளவரசி என்று அழைக்கப்படும் ஊட்டி, மாவட்டத்தில் அமைந்துள்ள இயற்கை எழில் கொஞ்சும் அழகிய சுற்றுலா தலமாகத் திகழ்கிறது.

வருடம் முழுவதும் குளிர்ச்சி நிலவும் தட்பவெப்பத்தை கொண்டிருக்கும் இந்த மலைப்பகுதிக்கு, உள்நாடு மட்டுமின்றி வெளிநாட்டில் இருந்தும் ஏராளமான சுற்றுலா பயணிகளை தன்னகத்தே ஈர்க்கிறது.

அவ்வாறு ஊட்டிக்கு சுற்றுலா வருபவர்கள், அதிகம் பிரபலமான இடங்களை மட்டும் பார்த்துவிட்டு திரும்பிச் செல்கின்றனர். ஆனால் இங்கே வியப்பூட்டும் அழகு நிறைந்த ஏராளமான இடங்கள் இருக்கின்றன.

இப்படிப்பட்ட இடங்களை பார்த்து ரசிப்பது உங்களுக்கு அளவில்லா மகிழ்ச்சியையயும், நீங்காத நினைவையும் கொடுக்கும். அந்த வகையில் அருவிகளும், வீயூ பாயின்ட்களும், அடர்ந்த வனப்பகுதியும் உங்களை மெய்மறக்கச் செய்யும்.

செவன் ஏஞ்சல்ஸ் அருவி: இந்த அருவி ஊட்டியில் உள்ள அழகான அவலாஞ்சி ஏரியின் மறுகரையில் அமைந்துள்ளது. இந்த செவன் ஏஞ்சல்ஸ் அருவிக்கு மழை காலங்களில் போக முடியாது. கோடை காலங்களில் அவலாஞ்சி ஏரியில் தண்ணீர் குறைந்த பின்னர்தான் போக முடியும். டிரக்கிங் போக விரும்புபவர்களுக்கு இது ஓர் அருமையான இடமாகும்.

கேத்ரின் அருவி : இந்த அருவி கோத்தகிரியில் உள்ளது. இந்த அருவிக்கு சிறிதுதூரம் நடந்து செல்ல வேண்டும். கோடை காலத்தில் குளிப்பதற்கு ஏற்ற வகையில் அளவாக தண்ணீர் கொட்டும். இது குடும்பத்தோடு குளித்து மகிழ ஏற்ற இடம். இந்த அருவி மேட்டுப்பாளையத்தில் இருந்து கோத்தகிரி செல்லும் வழியில் 32ஆவது கி.மீட்டரில் இருக்கின்றது.

நீடில் ராக் பாயின்ட் : இரண்டு பக்கமும் பள்ளத்தாக்கு, சில்லென்று வீசும் காற்று, மலைகளில் தவழும் வெண் மேகங்கள், அமைதியான நீண்ட பாதை என உங்களை ஆட்கொள்ளும் இடம்தான் இந்த வியூ பாயின்ட்.

குடும்பத்தோடு சென்று பார்த்து ரசிப்பதற்கு ஏற்ற இந்த பள்ளத்தாக்கு காட்சிமுனையானது, ஊட்டியில் இருந்து பைக்காரா ஏரி வழியாக முதுமலைக்கு செல்லும் வழியில் 42 ஆவது கீ.மீ. தொலைவில் அமைந்துள்ளது.

டால்பின் நோஸ் வியூ பாயின்ட் : குன்னூரில் இருந்து 11 கி.மீ. தொலைவில் இருக்கும் இந்த இடம் ஊட்டியில் உள்ள அழகான வியூ பாயின்ட்களில் ஒன்று. பள்ளத்தாக்கும், மலைகளும், சில்லென்று வீசும் காற்றும் செமையா இருக்கும். இந்த இடங்களை எல்லாம் மிஸ் பண்ணாம பார்த்து என்ஜாய் பண்ணுங்க.