வைரலான டால்பின் நோஸ் ட்ரோன் காட்சி.. அதிர்ச்சியில் வனத்துறையினர்

குன்னூர் டால்பின் நோஸ் காட்சி முனையில் பாதுகாக்கப்பட்ட வனப்பகுதியில் இயக்கப்பட்ட டிரோன் காட்சிகள் சமூக வலைதளங்களில் வெளியாகியுள்ளது குறித்து வனத்துறையினர் விசாரணை மேற்கொண்டு வருகின்றனர்.

நீலகிரி மாவட்டம் முழுவதும் டிரோன்கள் இயக்க தடை உள்ளது. அப்படி இயக்க வேண்டும் என்றால் மாவட்ட ஆட்சியர் அனுமதி பெற வேண்டும். இந்த நிலையில் குன்னூர் அருகே டால்பின் நோஸ் காட்சி முனை உள்ளது. வனத்துறையினர் கட்டுப்பாட்டில் இந்த சுற்றுலாதலம் இயங்கி வருகிறது. எதிரே கேத்ரின் நீர் வீழ்ச்சி விழும் காட்சி கண்களுக்கு விருந்தாக அமையும்.

இதனை சுற்றியுள்ள வனப்பகுதிகள் பாதுகாக்கப்பட்ட வனபகுதிகள் ஆகும். இந்த இடத்தின் டிரோன் காட்சிகள் தற்போது சமூக வலைதளங்களில் வைரலாகி வருகிறது. கடந்த வாரம் இந்த காட்சிகள் பதிவு செய்யப்பட்டுள்ளதாக கூறப்படுகிறது.

இதனால் இந்த வீடியோ காட்சிகளை யார் பதிவு செய்தது என்பது குறித்து குன்னூர் வனசரகர் சசிகுமார் தலைமையில் வனத்துறையினர் விசாரணை மேற்கொண்டு வருகின்றனர்.