driving licence | இனி டிரைவிங் ஸ்கூலில் பயிற்சியை முடித்தாலே லைசென்ஸ்.. 8 போடத் தேவையில்லை.. மத்திய அரசு அறிவிப்பு 

ஓட்டுநர் பயிற்சி மையங்களில் பயிற்சி முடித்தாலே இனி ஓட்டுநர் உரிமம் வழங்கப்படும் என சாலை போக்குவரத்து மற்றும் நெடுஞ்சாலைத்துறை அமைச்சகம் தெரிவித்துள்ளது. தற்போதைய நடைமுறைப்படி ஓட்டுநர் பயிற்சி முடித்த பின்பு ஆர்.டி.ஓ. அலுவலகம் சென்று வாகனத்தை ஓட்டிக்காட்ட வேண்டும். அதில் தேர்ச்சி பெற்றால் மட்டுமே ஓட்டுநர் உரிமம் வழங்கப்படும். புதிய விதியின் படி, அரசு அங்கீகாரம் பெற்ற ஓட்டுநர் பயிற்சி மையங்களில் வாகனத்தை இயக்கிப் பார்க்க பிரத்யேக தடம் அமைக்க வேண்டும்.

பயிற்சி முடித்த பின் அந்த தடத்தில் வாகனத்தை ஓட்டிக் காட்டினாலே போதுமானது. ஆர்.டி.ஓ. அலுவலகம் சென்று பரிசோதனைக்கு உட்படாமலேயே ஓட்டுநர் உரிமம் பெற்றுவிடலாம். இந்த புதிய நடைமுறை வரும் ஒன்றாம் தேதி நடைமுறைக்கு வரும் என மத்திய அரசு தெரிவித்துள்ளது.

புதிய விதிமுறை:
1. டிரைவிங் பழக வரும் நபர்களுக்கு அதிக தரமான பயிற்சியை வழங்க, இந்த மையங்கள் சிமுலேட்டர் வாகனம் போன்ற வடிவமைப்பு, டிரைவிங் பழகுவதற்கான பிரத்யேக பாதை ஆகியவற்றை வைத்திருக்க வேண்டும்.

2.மோட்டார் வாகன சட்டம், 1988ன் படி ஓட்டுநர் பயிற்சி மையங்களில் புத்தாக்க படிப்பு மற்றும் பயிற்சி வசதிகள் கிடைக்க வேண்டும்.

3.இந்த மையங்களில் வெற்றிகரமாக பயிற்சி பெற்ற நபர்கள் ஆர்டிஓ அலுவலகத்தில் ஓட்டுநர் உரிமத்திற்கு விண்ணப்பிக்கும் போது, ஓட்டுநர் பரிசோதனை தேர்வில் கலந்து கொள்வதில் இருந்து விலக்கு அளிக்கப்படும் என்றும் அங்கீகாரம் பெற்ற மையங்களில் வெற்றிகரமாக பயிற்சியை முடித்தால் ஓட்டுநர் உரிமம் பெற்றதற்கு சமம் என்றும் தெரிவிக்கப்பட்டது.

4.இந்த ஓட்டுநர் மையங்கள், தொழில் ரீதியான சிறப்பு பயிற்சியை அளிக்கவும் அனுமதிக்கப்படுகின்றன.