வடமாநிலங்களில் கடும் பனிப்பொழிவு.. பொதுமக்களின் இயல்பு வாழ்க்கை பாதிப்பு

இமாச்சல பிரதேச மாநிலம் மணாலியில் கடந்த சில நாட்களாக கடும் பனிப்பொழிவு நிலவி வருகிறது. சாலை முழுவதும் பனித்துகள்கள் கொட்டிக்கிடப்பதால் வாகன போக்குவரத்து முடங்கியுள்ளது.

சோலாங் நல்லாவில் இருந்து அடல் சுரங்கப்பாதை வரையிலான சாலையை பனி ஆக்கிரமித்ததால், வாகனங்கள் நடுவழியில் நிறுத்தப்பட்டன. இதனால் 500க்கும் மேற்பட்ட சுற்றுலாப்பயணிகள் பரிதவித்தனர்.

இதையடுத்து நிகழ்விடத்துக்கு சென்ற போலீசார், சுற்றுலாப்பயணிகளை மீட்டு, பாதுகாப்பான இடங்களுக்கு அனுப்பி வைத்தனர்.

மகாராஷ்டிரா மாநிலம் நாசிக்கில் காலையில் நிலவிய பனிமூட்டத்தால் வாகன ஓட்டிகள் கடும் அவதியடைந்தனர். பனிமூட்டம் காரணமாக வாகனங்கள் முகப்பு விளக்குகளை எரியவிட்டபடி சென்றன.

டெல்லி, ஹரியானா உள்ளிட்ட மாநிலங்களில் கடும் குளிருக்கு மத்தியில், கனமழை பெய்தது. குருகிராமில் பெய்த கனமழையால், சாலைகளில் வெள்ளநீர் பெருக்கெடுத்து ஓடியது.

டெல்லியில் நிலவும் கடும் குளிரால், வீடில்லாதவர்கள் இரவு நேர கூடாரங்களில் தஞ்சம் அடைந்துள்ளனர். சராய் கலே கான் பகுதியில் உள்ள கூடாரத்தில், 140 பேர் தங்குவதற்கு இடவசதி இருந்தும், கொரோனா தடுப்பு நடவடிக்கையாக 70 பேர் மட்டும் தங்க வைக்கப்பட்டுள்ளனர்.

ஜம்மு-காஷ்மீர் மாநிலம் ஸ்ரீநகரில் நிலவும் கடும் பனிப்பொழிவால் காணும் இடமெங்கும் வெண் போர்வை போர்த்தியது போல் காட்சியளிக்கிறது.

காஷ்மீரில் நிலவும் பனிப்பொழிவால் இயல்பு வாழ்க்கை பாதிக்கப்பட்டுள்ள நிலையில், பள்ளிகளில் தேர்வுகள் ஒத்திவைக்கப்பட்டுள்ளன.