தொடர் கனமழையால் விளைச்சல் பாதிப்பு.. கலங்கடிக்கும் வெங்காய விலை..

மகாராஷ்டிரா, கர்நாடகா உள்ளிட்ட மாநிலங்களில் தொடர் கனமழையால் விளைச்சல் பாதிக்கப்பட்டு, தமிழகத்தில் வெங்காய விலை கடுமையாக உயர்ந்துள்ளது.

மகாராஷ்டிரா, குஜராத், கர்நாடகா, தெலங்கானா உள்ளிட்ட பல்வேறு மாநிலங்களில் கடந்த சில நாட்களாக கனமழை பெய்து வருகிறது. இதனால் பல இடங்களில் வெங்காய சாகுபடி பாதிக்கப்பட்டுள்ளது. மேலும், இருப்பு வைக்கப்பட்டுள்ள வெங்காய மூட்டைகளும் சேதமடைந்துள்ளதாக கூறப்படுகிறது.

இதனால் வெங்காய வரத்து குறைந்து, அதன் விலை கடுமையாக உயர்ந்துள்ளது. திருச்சி வெங்காய மண்டியில் கடந்த வாரம் 70 ரூபாய்க்கு விற்கப்பட்ட சின்னவெங்காயம், தற்போது 30 ரூபாய் உயர்ந்து 100 ரூபாய்க்கு விற்கப்படுகிறது.

தரத்தில் இரண்டாவது ரக சின்னவெங்காயமும் 70 ரூபாய்க்கு விற்பனையாகிறது. இதேபோல் பெரிய வெங்காயமும் கிலோ 20 ரூபாய் வரை உயர்ந்து  72 ரூபாய்க்கு விற்கப்படுகிறது.

வெங்காய விலை உயர்வால் பொதுமக்கள் மிகவும் சிரமத்திற்கு ஆளாகியுள்ளனர். இருப்பினும், தை மாதம் வரை விலை உயர்வு நீடிக்கும் என வியாபாரிகள் தெரிவிக்கின்றனர்.

இதையடுத்து, விலை உயர்வை கட்டுப்படுத்த மத்திய, மாநில அரசுகள் உரிய நடவடிக்கை எடுக்க வேண்டும் என பொதுமக்கள் வலியுறுத்தியுள்ளனர்.