டெல்லியிலுள்ள அரசுப் பள்ளிக்குச் சென்ற மெலனியா டிரம்ப்: குழந்தைகளுடன் உரையாடி உற்சாகம்

டெல்லியிலுள்ள அரசுப் பள்ளிக்குச் சென்ற மெலனியா டிரம்ப் மாணவர்களுடன் உரையாற்றினார்.

அமெரிக்க அதிபர் டொனால்ட் டிரம்ப், இரண்டு நாள் பயணமாக இந்தியா வருகை தந்துள்ளார். குஜராத் மாநிலம் அகமதாபாத் வந்திறங்கிய அவருக்கு சிறப்பான வரவேற்பு அளிக்கப்பட்டது.

அவருடன் இணைந்து அவரது மனைவி மெலனியா டிரம்பும் வருகை தந்துள்ளார். நேற்று மாலை இருவரும் இணைந்து தாஜ்மகாலைச் சுற்றிப் பார்த்தனர். அதனைத் தொடர்ந்து இன்று காலையில் இருவரும் காந்தி நினைவிடத்துக்குச் சென்றனர்.

அதனையடுத்து, டிரம்ப், மோடி தலைமையில் இருதரப்பு பேச்சுவார்த்தை நடைபெற்றது. இந்தநேரத்தில் மெலனியா டிரம்ப் டெல்லியின் மோடிபாக் பகுதியிலுள்ள சர்வோதயா அரசுப் பள்ளிக்குச் சென்றார்.

 அவருக்கு பள்ளி மாணவர்கள், இந்தியக் கொடி, அமெரிக்க கொடியை அசைத்து வரவேற்றனர். மெலனியா டிரம்ப் வருகையையொட்டி பள்ளி வளாகம் பூக்களால் அலங்கரிக்கப்பட்டிருந்தது.

 மெலனியா டிரம்ப் வகுப்பறைகளையும், மாணவர்கள் யோகா செய்வதையும் கண்டு ரசித்தார். அதன்பிறகு மாணவர்களிடம் பேசிய அவர், ‘என்னை வரவேற்றதற்கு நன்றி.

தொடர்ந்து பேசிய அவர், ‘இந்தியாவுக்கு வருகை தருவது இதுதான் முதல்முறை. இங்குள்ள மக்கள் மிகவும் அன்புடன் வரவேற்கின்றனர்’ என்றார்.

தொடர்ந்த அவர், இயற்கையுடன் இணைந்து மனதை தயார்படுத்திக்கொண்டு அன்றைய நாளைத் தொடங்குவது மிகவும் ஊக்கமளிப்பதாக உள்ளது’என்றார்.

நல்ல எதிர்காலத்தை உறுதிப்படுத்தும் வகையில் ஆரோக்கியமான நேர்மறையான உதாரணங்கள் உருவாக்கப்பட்டுள்ளன’ என்று தெரிவித்தார்.