தனது நிர்வாகத்தின் கீழ் தவறு நடந்ததற்காக ஐ.ஏ.எஸ் அதிகாரி ஒருவர் தனக்குத்தானே ரூ.5 ஆயிரம் அபராதம் விதித்த சம்பவம் மஹாராஷ்டிராவில் நடந்துள்ளது.
கடந்த சுதந்திர தினத்தன்று டெல்லி செங்கோட்டையில் உரையாற்றிய பிரதமர் மோடி, ஒரு முறை பயன்படுத்தப்படும் பிளாஸ்டிக் பொருட்களுக்கு தடை விதிக்கப்படும் என்று கூறியிருந்தார். இதனை அடுத்து, மத்திய அரசு அலுவலக வளாகம், பாஜக ஆளும் மாநில அரசு அலுவலக வளாகங்களில் பிளாஸ்டிக் பொருட்கள் பயன்பாடு தடை செய்யப்பட்டது.
இந்த நிலையில், மஹாராஷ்டிரா மாநிலம் பீட் மாவட்டத்தின் ஆட்சியர் சில நாட்களுக்கு முன்னர் தேர்தல் தொடர்பாக செய்தியாளர்கள் சந்திப்பை நடத்தினார். இந்த நிகழ்ச்சியில் பிளாஸ்டிக் கப்பில் அனைவருக்கும் டீ வழங்கப்பட்டுள்ளது. இதனை அங்கேயே செய்தியாளர்கள் சுட்டிக்காட்டினர்.
இதனை அடுத்து, இதற்காக மன்னிப்பு கேட்ட ஆட்சியர் ஆஷ்டீக் குமார் பாண்டே, தனது தலைமையிலான மாவட்ட நிர்வாகத்திற்கு ரூ.5 ஆயிரம் அபராதம் விதித்தார். மேலும், பிளாஸ்டிக் கப்பில் டீ வழங்கியதற்காக அதிகாரிகளையும் அவர் கடுமையாக சாடினார்.
