டேட்டா கேபிளை வைத்து கொலை.. 'லிவ் இன்' காதலியை கொன்று பிரிட்ஜில் வைத்த காதலன்!

தலைநகர் டெல்லியில் உள்ள நசார்ப்கார்க்கைச் சேர்ந்த சாஹில் கெலாட் ( வயது 24) தாபா உணவகம் நடத்தி வருகிறார். இவருக்கும் டெல்லியில் தங்கி மருத்துவப் பயிற்சி படிப்பு படித்து வந்த  ஹரியானாவைச் சேர்ந்த 25 வயதான நிக்கி யாதவுக்கும் பேருந்தில் செல்லும்போது காதல் மலர்ந்துள்ளது. நிக்கி யாதவ் படிக்கச் செல்லும் நேரம் தவிர மற்ற நேரங்களில் இவர்கள் பார்க், தியேட்டர் என தங்களது காதலை வளர்த்துள்ளனர்.

பின்னர், நொய்டாவில் உள்ள கல்லூரியில் இருவரும் ஒரே படிப்பில் சேர்ந்த நிலையில் வாடகைக்கு வீடு எடுத்து  லிவ் - இன் - ரிலேஷன்ஷிப் முறையில் வசித்து வந்ததாகக் கூறப்படுகிறது. மேலும், மணாலி, ரிஷிகேஷ், ஹரித்துவார் என சுற்றுலா சென்று காதலை வளர்ந்து வந்தனர்.

இதனிடையே திருமணம் செய்துகொள்ள நிக்கி யாதவ் வற்புறுத்திய நிலையில் சாஹில் அதனை அலட்சியம் செய்து வந்துள்ளார்.
அத்துடன், காதலித்த பெண்ணை விட்டுவிட்டு வேறொரு பெண்ணை திருமணம் செய்துகொள்ள சாஹில் கெலாட் திட்டமிட்டுள்ளார்.

இதனை அறிந்த அந்த பெண், தன்னை திருமணம் செய்துகொண்டே ஆக வேண்டுமென சாஹிலிடம் சண்டையிட்டுள்ளார். இதனால் காதலி மீது கோபத்தில் இருந்த சச்சின், சம்பவத்தன்று காரில் இருந்து மொபைலுக்கு சார்ஜ் போடும் டேட்டா கேபிளை எடுத்து வந்து அதன்மூலம் நிக்கி யாதவை இறுக்கி கொலை செய்துள்ளார்.

பின்னர் உடலை மறைக்க தாபா ஹோட்டலில் உள்ள ப்ரீசர் பாக்ஸில் வைத்துவிட்டார். இதனிடையே காதலியை கொன்ற அன்றே எந்தவித சலனமும் இல்லாமல் ஊருக்குச் சென்று வேறோரு பெண்ணை திருமணம் செய்துள்ளார் சாஹில்.

நிக்கி யாதவ் கொலை செய்யப்பட்ட தகவல் போலீசாருக்கு கிடைக்க உடனடியாக விரைந்து வந்த காவல் துறையினர் ப்ரீசர் பாக்ஸில் இருந்த உடலைக் கைப்பற்றி பிரேத பரிசோதனைக்காக அனுப்பி வைத்தனர். நிக்கி யாதவ் கொலை செய்யப்பட்டு 3 நாட்கள் இருக்கலாம் என்று கூறப்படுகிறது.

இந்த விவகாரத்தில் சாஹிலை அவரது சொந்த கிராமத்தில் வைத்து கைது செய்த போலீசார் தீவிரமாக விசாரித்து வருகின்றனர். சமீபத்தில் டெல்லியில் தனது காதலியை துண்டு துண்டாக வெட்டி கொலை செய்து ப்ரிட்ஜில் வைத்திருந்த சம்பவம் பரபரப்பை ஏற்படுத்தி இருந்த நிலையில், அதேபோன்றதோரு சம்பவம் மீண்டும் நிகழ்ந்துள்ளது டெல்லியில் அச்சத்தை ஏற்படுத்தியுள்ளது.