காய்ந்த சருகில் அவதார் கதாபாத்திர பொம்மைகள்..! கலைப்படைப்புகள்.. மாஸ் காட்டும் அரசு பள்ளி மாணவர்கள்..

புதுச்சேரியின் எல்லை கிராமத்தில் சத்தமின்றி பல சாதனைகளை நிகழ்த்தி வருகிறது ஒரு அரசு பள்ளி. சேலியமேடு கிராமத்தில் இயங்கி வரும் வாணிதாசனார் அரசு உயர்நிலைப் பள்ளியில்  மாணவர்கள் உருவாக்கும் கலை பொருட்கள் தற்போது பலரது பரிசு பொருட்களாக மாறி வருகிறது.

கிராமப்புறத்தில் கிடைக்க கூடிய  வீணாகும் சுரக்காய் குடுவை, தென்னை, பனை மற்றும் வாழை மரங்களின் உலர்ந்த இலை, பூ, மட்டைகளை கொண்டு கண்கவர் கலை படைப்புகளை மாணவர்கள் உருவாக்கி வருகின்றனர்.

"அழிவின் உயிர்ப்பு' என்ற பெயரில் இப்பள்ளியில் இயங்கும் கலைக்கூடும் அசத்தும் கைவினைப் பொருட்களை உருவாக்கும் சுற்றுலா தளமாகவே மாறிவிட்டது.

பயிற்சிப் பட்டறையில் மாணவ மாணவிகள் உருவாக்கும் வித்தியாசமான கலைப்படைப்புகள் பொதுமக்கள் மத்தியில் பலத்த வரவேற்பைப் பெற்றுள்ளன.

அந்த வகையில் விரைவில் வெளியாக இருக்கும் அவதார்-2 படத்தை வரவேற்கும் விதமாக இங்குள்ள மாணவர்கள் நவநீத கிருஷ்ணன், சந்தோஷ் ஆகியோர்  பொம்மைகளை உருவாக்கியுள்ளனர்.

பல கோடி ரூபாய் செலவில் கிராபிக்ஸ் மூலம் உருவாக்கப்பட்ட அவதார் பட நாயகர்களை கிராமத்து தெருக்கோடிகளில் கிடைக்கும் பயனற்ற பொருட்களை கொண்டு இவர்கள் தத்ரூபமாக படைத்துள்ளனர்.

அவதார் படத்தை பார்த்த போது அதில் வரும் கதாபாத்திரங்கள் மனதில் ஏறிவிட்டன. பயனற்ற பொருட்களை கொண்டு அவதார் கதாபாத்திரங்களை உருவாக்கலாமா என பள்ளியின் ஓவிய ஆசிரியர் உமாபதியிடம் கேட்டதற்கு அவர் ஊக்கமளித்தார்.

இந்தக் கலை முயற்சிக்குப் பின்னணியில் உந்து சக்தியாக இருப்பவர் பள்ளியின் ஓவிய ஆசிரியர் உமாபதி. அவரது பயிற்சியில் ஏற்கனவே மாணவர்கள் கிராமங்களில் கிடைக்கக்கூடிய பொருட்களான சோளம், இலை, தென்னை, குறும்பு, மூங்கில், மர பட்டைகள் கொண்டு "வீடு தோறும் தேசியக்கொடி ஏற்றுவோம்" என்ற விழிப்புணர்வு பொம்மையை வடிவமைத்தனர்.

கொடியை முதியவர் ஏற்றுவதும் மற்றவர்கள் மரியாதை செய்வது போல் முப்பரிமாண முறையில்  உருவாக்கப்பட்டுள்ளது. இவர்கள் உருவாக்கிய தமிழன்னை பொம்மை இசையமைப்பாளர் A.R.ரகுமானால் பாராட்டப்ட்டது.

இந்த கலைப் பொருள்  மற்ற மாணவர்களுக்கும் ஊர் மக்களுக்கும் விழிப்புணர்வு ஏற்படுத்தும் வகையில் பள்ளி வளாகத்தில் வைக்கப்பட்டுள்ளது.

இதனை பார்க்கும் உள்ளூர் பெண்களும் விடுமுறை நாட்களில் அழிவின் உயிர்ப்பு மையத்திற்கு வந்து கிராமங்களில் கிடைக்க கூடிய எளிய பொருட்களை கொண்டு கலைவடிவங்களை ஆர்வத்துடன் கற்கின்றனர்.

மாணவர்கள் உருவாக்கிய பாரம்பரிய வில்லுவண்டி பொம்மைகள் தற்போது பல விஐபி வீடுகளில் வரவேற்பறையை அலங்கரிக்கின்றன. இங்கு உருவாகும் பொம்மைகள் வெளிநாடுகளுக்கு பரிசு பொருளாக அனுப்பப்படுகிறது.

அந்த வகையில் அவதார் கதாபாத்திர பொம்மைகள் அனைவரையும் ஈர்க்க துவங்கி விட்டது. இதன் புகைப்படங்கள் தற்போது  வைரலாகி வருகிறது.

ஜேம்ஸ் கேமரூன் இயக்கியுள்ள இந்தத் திரைப்படம் பல ஆண்டுகளாக தயாரிப்பில் உள்ளது. எல்லா காலத்திலும் மிகவும் எதிர்பார்க்கப்படும் படமாகவும் மாறியிருக்கிறது.

இத்திரைப்படம் டிசம்பர் 16, 2022 அன்று வெளியாக உள்ளது. தி வே ஆஃப் தி வாட்டர் என்ற பெயரில் வெளியாக உள்ளது.

2009-ல் வெளியான அவதார் திரைப்படத்தைப் போலவே, கேமரூன் இந்த அவதார் 2 படத்தையும் தருவார் என்று எதிர்பார்க்கப்படுகிறது.