Save Soil : 4 கரீபியன் நாடுகள் மண் காப்போம் இயக்கத்துடன் புரிந்துணர்வு ஒப்பந்தம்

மண்ணை காக்க கை கோர்க்கும் நாடுகள் : சத்குரு தொடங்கி உள்ள மண்வளம் காப்போம் (SaveSoil) இயக்கத்திற்கான புரிந்துணர்வு ஒப்பந்தத்தில் ஆன்டிகுவா & பார்படா, டொமினிகா, செயின்ட் லூசியா, செயின்ட் கிட்ஸ் & நெவிஸ் ஆகிய 4 கரீபியன் நாடுகளின் பிரதமர்கள் மற்றும் அமைச்சர்கள் தங்கள் பங்களிப்பை ஆற்றியுள்ளனர்.

சர்வதேச பாடகர் மெச்சல் மோண்டனோ முக்கிய பங்கு : சத்குருவின் மண் வளம் காப்போம் விழிப்புணர்வு குறித்து தனது பாடல்கள் வாயிலாக சர்வதேச பாடகர் மெச்சல் மோண்டனோ (Machel Montano) ஏராளமான மக்களிடம் கொண்டு செல்ல தனது பங்கினை செலுத்தி வருகின்றார்.

'சோகா இசையின் அரசன்' (King of Soca) என்று இவர் அழைக்கப்படுகின்றார். இவர் இந்த ஒப்பந்தங்கள் கையெழுத்தாவதற்கு மிக முக்கிய பங்கினை செலுத்தி உள்ளார்.

மண்வளம் காப்பது குறித்து ஆன்டிகுவா & பார்படா நாட்டின் பிரதமர் கருத்து : இந்த இயக்கத்துடன் புரிந்துணர்வு ஒப்பந்தம் செய்ததில் மகிழ்ச்சியாக உள்ளது. மண் வளம் அழிவை நோக்கி சென்று கொண்டு உள்ளது. இது நமது பூமிக்கு மிகப் பெரும் அச்சுறுத்தல்.

நாங்கள் மண் வளம் காப்பது குறித்த பிரச்னையில் ஆரம்பத்திலேயே இணைந்து விட்டோம். 30 வருடங்களுக்கு முன்னர் பருவ நிலை மாற்றம் அச்சுறுத்தலாக கண்டறியப்பட்ட போது எங்கள் கரீபிய நாடு அதற்காக போராடுவதில் முக்கிய பங்கினை செலுத்தி உள்ளது என ஆன்டிகுவா & பார்படா நாட்டின் பிரதமர் கூறியுள்ளார்.

இது குறித்து செயின்ட் லூசியா நாட்டின் பிரதமர் பிலிப் ஜே பெர்ரி கூறும்போது , எங்கள் நாட்டின் விவசாயத்தை நாங்கள் மீட்டெடுக்க வேண்டும். அதற்க்கு மண்வளம் காப்பது அவசியமான ஒன்று. நாங்கள் விவசாயத்தை காக்க இந்த இயக்கம் எங்களுக்கு பயனுள்ளதாக இருக்கும் என கூறியுள்ளார்.

இது குறித்து டொமினிகா நாட்டின் பிரதமர் ரூஸ்வெல்ட் கெர்ட் பேசுகையில், மண்வளம் காப்போம் இயக்கத்திற்கு எங்கள் முழு ஆதரவையும் நாங்கள் தருகின்றோம். விவசாயம் தான் முக்கியமான ஒன்று அது சிறப்பாக நடந்தால் மட்டுமே மக்களுக்கு உணவு அளிக்க முடியும். விவசாயம் சிறப்பாக நடைபெற மண்வளம் முக்கியம் மண்வளத்தை பாதுகாப்பது அவசியமான ஒன்று என கூறியுள்ளார்.

செயின்ட் கிட்ஸ் & நெவிஸ் நாட்டின் பிரதமர் திமோதி ஹாரீஸ் பேசுகையில், இந்த முன்னெடுப்பு கரீபியன் பகுதிக்கு புரிந்துணர்வு ஒப்பந்தம் செய்யப்பட்டது அனைத்து உயிர்களின் நலன் கருதியே. எங்களுக்கு அனைத்து உயிர்களின் நலனும் மிக முக்கியம் என கூறியுள்ளார்.

இறுதியாக மண்வளம் பாதுகாப்பு குறித்து பேசிய சத்குரு, பூமியில் இருக்கும் அனைத்து உயிரினங்களுக்காகவும் கட்டாயம் மண் வளம் காக்கப்பட வேண்டும். காக்க முடியும் என்பதற்கு கரீபியன் நாடுகள் சிறந்த எடுத்துக்காட்டு. கடலில் இருக்கும் முத்துக்களை போல் இருக்கும் இந்த சிறிய நாடுகள் மண்வளத்தை மீட்டெடுக்க உறுதி எடுத்துள்ளதாக கூறியுள்ளார்.

மண் என்பது உயிரற்ற பொருள் அல்ல. அதனை எவ்விதமாகவும் நாம் நமது தேவைக்கேற்றார் போல் பயன்படுத்தலாம் என்பதும் தவறான அணுகுமுறை. மண் என்பது உயிர் சக்தி உடைய ஒன்று. மண்ணுக்கு உயிர் உள்ளது. தற்கால இளைஞர்களுக்கும், எதிர்கால தலைமுறைக்கும் நாம் சொல்ல வேண்டிய மிக முக்கியமான செய்தி மண்ணுக்கும் உயிர் உள்ளது என சத்குரு கூறியுள்ளார்.

கரீபியன் நாடுகளின் மண் வளத்தை மீட்டெடுப்பதற்கு செய்ய வேண்டிய வழிமுறைகள் அடங்கிய புத்தகத்தை 4 நாடுகளின் தலைவர்களுக்கும் சத்குரு வழங்கினார்.