எட்டுக்குடி முருகன் கோயிலில் தைப்பூச திருவிழா கோலாகலம்.. படையெடுத்த பக்தர்கள்

மாவட்டம், திருக்குவளை அருகேயுள்ள எட்டுக்குடி ஸ்ரீசுப்பிரமணிய சுவாமி கோயிலில் தைப்பூசத்தையொட்டி இன்று  சிறப்பு வழிபாடு நடைபெற்றது.

முருகனின் ஆதி படை வீடு என அழைக்கப்படும் இக்கோயிலில் நடைபெறும் வழிபாடுகளில் தைப்பூச வழிபாடு சிறப்பு பெற்ற ஒன்றாகும்.

தைப்பூசத்தை முன்னிட்டு முருகப்பெருமான் பரிசட்டத்தில்  எழுந்தருளி சிறப்பு பூஜைகள் நடைபெற்றன. தொடர்ந்து, அஸ்திரத் தேவருக்கு சரவணப்பொய்கையில் சிறப்பு வழிபாடுகள், தீா்த்தவாரி நடைபெற்றது.

பின்னர், முருகப் பெருமானுக்கு பல்வேறு திரவியங்களால் மகா அபிஷேகம் மற்றும் விபூதிக்காப்பு அலங்காரம் செய்யப்பட்டு மகா தீபாராதனை காட்டப்பட்டது.

தைப்பூசத்தை முன்னிட்டு காலை முதலே நாகை, மயிலாடுதுறை, திருவாரூர் உள்ளிட்ட பல்வேறு மாவட்டங்களில் இருந்து ஆயிரக்கணக்கான பக்தா்கள் பங்கேற்று சுவாமி தரிசனம் செய்து வருகின்றனர்.

மேலும் தைப்பூசம் மற்றும் ஞாயிறு விடுமுறையை முன்னிட்டு ஏராளமான பக்தர்கள் வருகை தந்துள்ளதால் எட்டுக்குடி - திருக்குவளை பிரதான சாலையில் போக்குவரத்து நெரிசல் ஏற்பட்டு வாகனங்கள் ஊர்ந்தபடியே‌ சென்று வருகின்றன‌.