நடிகர் விஜய் பெயரில் திருக்கடையூர் கோவிலில் சிறப்பு பூஜை செய்த எஸ்.ஏ. சந்திரசேகர் - படங்கள்

திரைப்பட இயக்குனர் எஸ்.ஏ. சந்திரசேகர் மற்றும் அவரது மனைவி ஷோபா சந்திரசேகர் ஆகியோர் திருக்கடையூர் ஸ்ரீ அபிராமி உடனாகிய ஸ்ரீ அமிரகடேஸ்வரர் கோவிலில் ஆயுள் விருத்தி வேண்டி சிறப்பு ஹோமம் செய்து வழிபாடு செய்தனர்.

நடிகர் விஜய்க்கும் அவரது தந்தை எஸ்.ஏ. சந்திரசேகருக்கும் இடையே பல்வேறு கருத்து வேறுபாடுகள் நடந்து வந்த நிலையில் இந்த சம்பவம் ரசிகர்கள் மத்தியில் கவனத்தை ஈர்த்துள்ளது.

தந்தை மகன் இருவருக்கு நடுவிலும் பனிப்போர் சென்றுகொண்டிருப்பதாக தமிழ்திரையுலகு வட்டாரத்தில் ஒரு பேச்சு நடைபெற்று கொண்டு தான் இருக்கிறது. விஜய்யின் அரசியல் ஈடுபாடு போன்ற சில நிகழ்வுகளால் இருவருக்கும் நடுவே மனக்கசப்பு இருப்பதாகவே பார்க்கப்படுகிறது.

இந்நிலையில் கோவில் வழிபாட்டின்போது தனது மகன் விஜய் பெயரில் சிறப்பு பூஜை செய்திருக்கிறார் எஸ்.ஏ. சந்திரசேகர். மேலும் அவர்களின் ஆயுள் விருத்திக்காகவும் பூஜை செய்துள்ளனர்.

மயிலாடுதுறை மாவட்டம் தரங்கம்பாடி தாலுகா திருக்கடையூரில் தருமபுரம் ஆதீனத்திற்கு சொந்தமான ஸ்ரீ அபிராமி உடனாகிய ஸ்ரீ அமிர்தகடேஸ்வரர் கோவில் உள்ளது. இங்கு மூலவராக அமிர்தகடேஸ்வரரும், காலசம்கார மூர்த்தியும் அருள்பாலித்து வருகிறார்கள்.

சிவன், எமனை  சம்ஹாரம் செய்து மார்க்கண்டேயனுக்கு  என்றும் பதினாறு என்று வரம் அளித்த தலமாக விளங்குவதால்  பக்தர்கள் தங்கள் ஆயுள் விருத்தி வேண்டி  சஷ்டியப்தபூர்த்தி, (அறுபதாம் கல்யாணம்) செய்வது சிறப்பம்சமாகும்.

மேலும் ஆயுள் விருத்திக்காக உக்ரரதசாந்தி, பீமரத சாந்தி, சதாபிஷேகம் கனகாபிஷேகம்  உள்ளிட்ட திருமண பூஜைகள் செய்யப்படுகின்றன.இந்த நிலையில் திரைப்பட இயக்குனர் எஸ்.ஏ. சந்திரசேகர்  கோவிலுக்கு வந்து சிறப்பு ஹோமம் செய்து கொண்டார்.

எஸ். ஏ. சந்திரசேகர் 80 வயது பூர்த்தி அடைந்ததை முன்னிட்டு ஆயுள் விருத்திக்காக சதாபிஷேக ஹோமம் செய்து வழிபாடு செய்தனர். தனது மகன் நடிகர் விஜய் பெயரில் அர்ச்சனையும் செய்தார்.

தொடர்ந்து விநாயகர், அமிர்தகடேஸ்வரர், அபிராமி, முருகன் உள்ளிட்ட சன்னதிகளுக்கு சென்று அவர் சாமி தரிசனம் செய்தார்.மேலும் அங்கிருந்த மக்களுக்கு பிரசாதம் வழங்கினார்.