பேரழகு பொதிந்து கிடக்கும் மதுரை மீனாட்சியம்மன் கோவில் ஆயிரங்கால் மண்டபம் - சுற்றிப்பார்க்க ஒருநாள் போதாது!

மீனாட்சியம்மன் கோவில் 45 ஏக்கர் (180,000 சதுர மீட்டர்கள்) நிலத்தில் அமைக்கப்பட்டுள்ள பிரம்மாண்ட கோவிலாகும். இது 8 கோபுரங்களை கொண்டதாக உள்ளது. 8 கோபுரங்களும், நான்கு முனை சதுர வடிவில் அமைக்கப்பட்டுள்ளன. இங்குள்ள இரட்டை கோபுரத்தின் ஒன்றில் மீனாட்சியம்மனும், மற்றொன்று சுந்தரேஸ்வரரரும் வீற்றுள்ளனர்.

மீனாட்சியம்மன் விக்கிரகம் முழுவதுமாக தூய மரகத மாணிக்கத்தினால் உருவாக்கப்பட்டது என்கின்றனர். மரகத்தின் இயற்கை வர்ணமான பச்சை நிறத்தில் காட்சி தரும் மூல விக்கிரகத்தினை “மரகதவல்லி” எனவும் அழைக்கின்றனர்.

மதரை மீனாட்சி அம்மன் கோவிலில், அஷ்டசக்தி மண்டபம், மீனாட்சி நாயககர் மண்டபம், முதலி மண்டபம், ஊஞ்சல் மண்டபம், கம்பத்தடி மண்டபம், கிளிக் கூட்டு மண்டபம், மங்கையர்க்கரசி மண்டபம் மற்றும் சேர்வைக்காரர் மண்டபம் போன்ற கலையழகு மிக்க மண்டபங்கள் இருக்கின்றன.

இந்த கோவிலில் கிருஷ்ணப்ப நாயக்கர் காலத்தில் அவருடைய அமைச்சர் அரியநாத முதலியாரால் இங்கு அமைக்கப்பட்ட ஆயிரங்கால் மண்டபம் மிகச் சிறப்பு பெற்ற ஒன்றாகும். கலையில் அற்புதங்களை நிகழ்த்திய இடமாக இது திகழ்கிறது.

ஆயிரங்கால் மண்டபம் என்ற பெயருடன் இருக்கும் இந்த மண்டபத்தில் தற்போது 985 தூண்கள் இருக்கின்றன. இந்த மண்டபத்தின் தூண்கள் எந்த இடத்தில் இருந்து பார்த்தாலும் ஒரே வரிசையில் அமைந்திருக்கும் படி அமைக்கப்பட்டிருப்பது தனிச் சிறப்பாகும்.

ஒவ்வொரு தூணும் சுமார் 12 அடி உயரம் உயையவை. ஒவ்வொரு தூணும் ஒரு வித வடிவமைப்பு கொண்டுள்ளது. ஒன்றில் ஒரு தேவதை, இன்னொன்றில் யாளி, இன்னொன்றில் ஆலயத்திற்கு சேவை செய்த குடும்பத்தின் உறுப்பினர் என்று வித்தியாசங்களும் ஒருமைப்பாடும் கொண்டு அழகாக அமைக்கப்பட்டுள்ளன.

இந்த ஆயிரங்கால் மண்டபத்தின் மையத்தில் இருக்கும் ஒருவரை மண்டபத்தின் எந்த இடத்திலிருந்து பார்த்தாலும் அவரை எந்த தூணும் மறைக்காது என்பது வியப்புக்குரிய அதிசயம். வெவ்வேறு அகலம் மற்றும் நீளமுடைய 16 பகுதிகள் இந்தத் தூண்களைக் கொண்டு நேர்த்தியுடன் துல்லியமாக அமைக்கப்பட்டுள்ளன.

இந்த மண்டபம் சைவ, வைணவ சமயத்தின் களஞ்சியமாகத் திகழ்கிறது என்றே சொல்லலாம். தூண்களில் இருக்கும் சிற்பங்கள் பல்வேறு புராண சம்பவங்களை விளக்கிக் காட்டும் விதத்தில் வடிவக்கப்பட்டுள்ளன. பல தூண்களின் சிற்ப வேலைப்பாடுகள் பூர்த்தி செய்யப்படாமலும் இருக்கின்றன.

சிவபெருமானின் திருவிளையாடல்களை எடுத்துக்காட்டும் சிற்பங்கள் காண்போரை மெய் சிலிரிக்க வைப்பதுடன், அதன் ஒங்கிணைப்பு அனைவரின் கவனத்தையும் ஈர்க்கும் விதத்தில் அழகுற வடிவகைகப்பட்டுள்ளன. இதேபோல பல தூண்கள் வைணவ சமயத்தின் கதைசொல்லும் சிற்பங்களாக திகழ்கின்றன.

மதுரையின் பிரபல ENT (காது, மூக்கு, தொண்டை மருத்துவ நிபுணர்) மருத்துவர் காமேஸ்வரன் இந்த ஆயிரங்கால் மண்டபத்தை நவீன கருவிகளுடன் ஆராய்ந்தார். அப்போது, இந்த மண்டபத்தில் ஒலியைக் கட்டுப்படுத்தும் அற்புத கட்டிட உத்தி பயன்படுத்தப்பட்டிருப்பதாக தெரிவித்தார்.உலக மக்களை தன்னே நோக்கி ஈர்க்கும் பேரழகை கொண்டதாக உள்ளது.