புதுச்சேரியில் ஒரு கிலோ வெங்காயம் 100 ரூபாய்.. அமைச்சர் நேரில் ஆய்வு..

தமிழகத்தை போலவே புதுச்சேரியிலும் வெங்காயத்தின் விலை உயர்ந்துள்ளது. இந்நிலையில் புதுச்சேரிக்கு நாள் ஒன்றிற்கு 140 டன் வெங்காயம் தேவைப்படுகிறது. ஆனால்  40 டன் மட்டுமே புதுச்சேரிக்கு வருகிறது.

ஆந்திராவில் கனமழை காரணமாக அங்கிருந்து வெங்காயம் வரவில்லை.பெங்களூரில் இருந்து வரும் வெங்காயம் மூட்டைக்கு 10 கிலோ அழுகிய விடுகிறது.நாசிக்கில் இருந்து வரும் வெங்காயம் 75 முதல் 85 ரூபாய்க்கு கூடுதல் விலைக்கு வருவதால் அதனை வாங்கி 100 ரூபாய் வரை விற்கப்படுகிறது.60 ரூபாய்க்கு விற்ற பெல்லாரி வெங்காயம் 90 முதல் 100 ரூபாய் என விற்கப்படுகிறது. 40 ரூபாய்க்கு விற்ற மீடியம் வெங்காயம் 70 முதல் 80ரூபாய்க்கு விற்கப்படுகிறது.சின்ன வெங்காயம் 120 ரூபாய்க்கு விற்கப்படுகிறது.

இந்த நிலையில் வெங்காயம் பதுக்கி வைக்கப்படுவதாகவும் கூடுதல் விலைக்கு விற்கப்படுவதாகவும் குடிமைப்பொருள் வழங்கல் துறை அமைச்சர் கந்தசாமிக்கு புகார் வந்தது. இதன்படி பெரிய மார்க்கெட்டில் அவர் திடீர் ஆய்வு செய்தார்.கடைகளின் கிடங்குகளிலும் ஆய்வு செய்த அமைச்சர் வெங்காயத்தை பதுக்க கூடாது.கூடுதல் விலைக்கு விற்கக்கூடாது என வியாபாரிகளை எச்சரித்தார்.

தமிழகத்தை போல மலிவு விலையில் வெங்காயத்தை மக்களுக்கு வழங்க முடியாமல் துணைநிலை ஆளுநர் கிரண்பேடி தடையாக இருக்கிறார்.ரேஷன் மூலம் அரிசி வழங்க தடை செய்யும் கிரண்பேடி பல கோப்புகளை முடக்கியுள்ளார் என அமைச்சர் கந்தசாமி குற்றம்சாட்டினார்.