T20 Worldcup Eng vs WI: இது டெலிபோன் நம்பர் அல்ல: 3695160603- வெஸ்ட் இண்டீஸ் வீரர்களின் ஸ்கோர்

கடந்த 2016 டி20 உலகக்கோப்பை சாம்பியனான வெஸ்ட் இண்டீஸ் அதிரடி வீரர்கள், டீசண்ட் பவுலிங் ஆகியவற்றை வைத்துக் கொண்டு இப்படியா ஆடுவது? படுமோசமாக ஆடி 55 ரன்களுக்கு ஆல் அவுட் ஆக இங்கிலாந்து போராடி 4 விக்கெட்டுகளை இழந்து வெற்றி பெற்றது.

இந்த ஆட்டத்தினால் ரசிகர்கள் கடும் ஏமாற்றமடைந்தனர், இங்கிலாந்தை எதிர்க்கும் ரசிகர்களுக்கு கடும் ஏமாற்றமாக அமைந்தது. அனைவரும் ‘மூளைகெட்ட பேட்டிங்’ என்று சாடி வருகின்றனர். இப்படிப்பட்ட மோசமான ஒரு பேட்டிங்கை பார்த்ததில்லை என்று பலரும் கண்டித்துள்ளனர்.

வெஸ்ட் இண்டீஸ் அணி தன் 10 விக்கெட்டுகளில் 9 விக்கெட்டுகளை பவுண்டரி அல்லது சிக்ஸ் அடிக்கப்போய் இழந்தனர். 86 பந்துகளில் வெஸ்ட் இண்டீஸ் 59 பந்துகளில் ரன்களையே எடுக்கவில்லை.

ஓவருக்கு 6 ரன்கள் என்ற வீதத்தில் விக்கெட்டுகளை கொடுக்காமல் ஆடுவதை விடுத்தனர். கிறிஸ் கெய்ல் உண்மையில் அணியில் இருக்க வேண்டியவர் அல்ல,

கெய்லுக்குப் பதிலாக உண்மையில் ராஸ்டன் சேஸ் அல்லது ஷேய் ஹோப் ஆகியோரை வைத்திருக்க வேண்டும்.

அதே போல் ரவி ராம்பாலுக்கு பதிலாக ஜேசன் ஹோல்டரையும் ஆபிட் மெக்காய்க்கு பதிலாக ஸ்குவாடில் உலகின் தலைசிறந்த டி20 ஸ்பின்னர் சுனில் நரைனை வைத்திருக்க வேண்டும்.

மொயின் அலி வெஸ்ட் இண்டீஸின் டாப் 4 இடது கை வீரர்கள் இருந்ததால் ஓபனிங் கொடுக்கப்பட்டார். லெண்டில் சிம்மன்ஸ், ஷிம்ரன் ஹெட்மையர் விக்கெட்டை அலி வீழ்த்தியதோடு எவின் லூயிஸுக்கு அற்புத கேட்சை எடுத்தார்.

கிறிஸ் கெய்ல் அதிகபட்சமாக 13 ரன்கள் எடுத்து கொடியேற்றி அவுட் ஆனார், இதுவும் அருமையான கேட்ச். டைமல் மில்ஸ் என்ற இடது கை வீரர் அருமையான ஷார்ட் பிட்ச் பந்தை வீசினார் கெய்லுக்கு.

தொடர்ந்து விக்கெட்டுகளாக இழந்து வந்தனர். சிங்கிள்கள், 2 ரன்கள் எடுப்போம் என்ற சிந்தனையே இல்லாமல் வருவோரெல்லாம் தூக்கி அடித்து ஆட்டமிழந்தனர். ஆதில் ரஷீத் வந்தார் சப்ஜாடா அனைத்தையும் முடித்து வெஸ்ட் இண்டீஸுக்கு தன்னால் முடிந்த சடங்கைச் செய்தார். 2.2 ஓவர் 2 மெய்டன் 4 விக்கெட். சிக்கன விக்தம் 0.9 இது உலக சாதனையாக இருக்க வாய்ப்புள்ளது.

மிகவும் மந்தமான பிட்சைப் போட்டு டி20 கிரிக்கெட்டையே யுஏஇ காலி செய்து வருகிறது ஐசிசி கவனிக்குமா என்பதைப் பொறுத்திருந்து பார்க்க வேண்டும்.