எல்லோருக்கும் ஹாபி கண்டிப்பாக இருக்கனும்..! ஏன் தெரியுமா..?

நம் வாழ்க்கை மிகவும் குறுகிய காலம் கொண்டது. இதில் குதூகலத்தை தரக் கூடிய நடவடிக்கைகள் என்பது அதிகம் இருக்காது. ஆகவே, நமக்கு மன ஆறுதல் தருகின்ற ஏதோ ஒரு பொழுதுபோக்கு பழக்கம் நம்மிடம் இருக்க வேண்டும். ஆனால், நிச்சயமாக அது நம் உடலையும், மனதையும் சுறுசுறுப்பாக வைத்துக் கொள்ளும் வகையில் அமைய வேண்டும்.

பொழுதுபோக்கு பழக்கம் என்றால் என்ன? அது உங்களுக்கு மகிழ்ச்சி தரக் கூடியதாக இருக்க வேண்டும். வாழ்க்கையில் ஒரு திருப்திகரமான நிலையை ஏற்படுத்த வேண்டும். வாழ்க்கையை பூர்த்தி அடைந்ததாக மாற்ற வேண்டும். இதன் மூலமாக உங்களுக்கு பணம் வருகிறதோ இல்லையோ, நிச்சயம் மன நிம்மதி கிடைப்பதாக இருக்க வேண்டும். சிலர் குடும்பத்தினர் மற்றும் நண்பர்களுடன் பொழுதுபோக்குவதை வாடிக்கையாக வைத்துள்ளனர். எப்படியாகினும் இதன் மூலமாக உங்களுக்கு கிடைக்கக் கூடிய நன்மைகள் என்னவென்று பார்க்கலாம்.

ஸ்ட்ரெஸ் குறையும் : நாம் எவ்வளவு கடினமாக உழைத்தும், அதற்குரிய பாராட்டுக்கள் கிடைக்கவில்லை என்றால், பொழுதுபோக்கு அம்சங்கள் தான் உதவிகரமாக இருக்கும். இதுதான் ஸ்ட்ரெஸ் குறைக்க உதவும். அது டென்னிஸ் விளையாட்டாக இருக்கலாம் அல்லது புத்தம் வாசிப்பதாக இருக்கலாம் அல்லது பூங்காவில் நடைபயிற்சி செய்வதாக இருக்கலாம். எப்படியாகினும் மன பாரம் குறைய வேண்டும்.

சமூகத்துடன் கலக்கலாம் : தனிமையில் யார் ஒருவராலும் ரொம்ப நாளைக்கு இனிமை காண முடியாது. அன்றாடம் சக மனிதர்களை பார்த்து, பழகி வந்தால் மட்டுமே இன்ப, துன்பங்களை பகிர்ந்து கொள்ள முடியும். ஆகவே, சமூகத்துடன் ஒரு தொடர்பை ஏற்படுத்திக் கொள்ள இந்தப் பொழுதுபோக்கு பழக்கம் ஒரு வழிமுறையாக அமையும்.

நம்பிக்கை அதிகரிக்கும் : புத்தகம் வாசிப்பது அல்லது எதையேனும் எழுதுவது அல்லது இசைக்கருவியை இசைப்பது என எதுவானாலும் அது உங்கள் தன்னம்பிக்கையை அதிகரிப்பதாக அமையும். குறிப்பாக, நீங்கள் பொழுதுபோக்காக மேற்கொள்ளும் விஷயத்தில் நீங்கள் மிகுந்த திறன் கொண்டவராக மாறும் பட்சத்தில் அது உங்களுக்கு பக்கபலமாக அமையும்.

அறிவு மேம்படும் : புதிய விஷயத்தை மேற்கொள்ள வேண்டும் மற்றும் அறிவை விரிவாக்கம் செய்ய வேண்டும் என்ற வேட்கை அதிகரிக்கும். உதாரணத்திற்கு நீங்கள் சதுரங்க விளையாட்டு விளையாடுகிறீர்கள் என்றால், அதில் புதுப்புது உத்திகளை பயன்படுத்தி எப்படி வெற்றி அடையலாம் என்று உங்கள் மனம் சிந்திக்க தொடங்கும்.

வாழ்க்கை தரம் மேம்படும் : போட்டி, பொறாமை நிறைந்த உலகில் மனநிம்மதியை மட்டும் தருகின்ற விஷயமாக பொழுதுபோக்கு பழக்கங்கள் அமையும். ஆக, நம் வாழ்க்கையை மனப்பூர்வமாக ஏற்றுக் கொண்டு வாழத் தொடங்குவோம். பள்ளி, கல்லூரி அல்லது அலுவலக வேலை என்ற வழக்கமான பணிகளை தாண்டி வெளியுலகின் அழகை காணத் தொடங்குவோம்.