இந்த நாடுகளில் நீங்கள் தங்கும் ஒவ்வொரு நாளுக்கும் சுற்றுலா வரி செலுத்த வேண்டும் என்பது தெரியுமா..?

பொதுவாக வெளிநாடுகளுக்கு சுற்றுலா செல்லும்போது உங்கள் விசா மற்றும் பிற விஷயங்களுக்கு நீங்கள் செலுத்தும் கட்டணம் பற்றி அறிந்திருப்பீர்கள். அதற்கு அடுத்தபடியாக பயண கட்டணம் இருக்கும். இது போக கூடுதலாக சில நாடுகளில் சுற்றுலா வரியும் செலுத்த வேண்டும் என்பது உங்களுக்குத் தெரியுமா.?

சுற்றுலா வரிகள் பொதுவாக தங்குமிட வழங்குநர்கள் அல்லது விடுமுறை நிறுவனங்கள் மூலம் மறைமுகமாக விதிக்கப்படும் சிறிய கட்டணங்களாகும். உலகெங்கிலும் உள்ள அதிகமான இடங்கள் சுற்றுலா வரிகளை அறிமுகப்படுத்துகின்றன. சுற்றுலாவின் ஏற்படும் எதிர்மறை விளைவுகளைத் தணிக்க மற்றும் பார்வையாளர்களின் எண்ணிக்கையைக் குறைக்க இந்த நிதி உதவுகிறது. அப்படி சுற்றுலா வரிகள் உள்ள நாடுகளை பற்றி தெரிந்து கொள்ளுங்கள்.

தாய்லாந்து தனது நாட்டிற்கு வரும் வெளிநாட்டு சுற்றுலா பயணிகளிடம் இருந்து 300 பாட் கட்டணத்தை வசூலிக்கும். வரியிலிருந்து திரட்டப்படும் பணம் விபத்துகளில் சிக்கிய பயணிகளுக்கு ஆதரவளிப்பதற்கும் சுற்றுலா தலங்களை மேம்படுத்துவதற்கும் பயன்படுத்தப்படும் என்று அந்த அரசு தெரிவித்துள்ளது.

அதிகப்படியான சுற்றுலா பயணிகள் வரவைக் கட்டுப்படுத்த, வெனிஸ் சுற்றுலாப் பயணிகளிடம் நுழைவுக் கட்டணத்தை வசூலிக்கத் தொடங்கியுள்ளது. பல தசாப்தங்களாக, லகூன் நகரம் அதிக சுற்றுலாவினால் பாதிக்கப்பட்டுள்ளது, இறுதியில் ஜனவரி 16, 2023 முதல் இந்தக் கட்டணத்தை நடைமுறைப்படுத்த பட்டுள்ளது. புதிய டிஜிட்டல் முறையின் மூலம் பயணிகள் வரி செலுத்தி முன்பதிவு செய்வது இப்போது கட்டாயமாக்கப்பட்டுள்ளது

வலென்சியா(valencia) எனும் அழகான இடமானது 2023 ஆம் ஆண்டின் இறுதியில் அல்லது 2024 ஆம் ஆண்டின் முற்பகுதியில் இருந்து சுற்றுலா வரி விதிக்கவுள்ளது. விடுமுறைக்கு வருபவர்கள் அவர்கள் தேர்ந்தெடுக்கும் தங்குமிடத்தைப் பொறுத்து ஒரு இரவுக்கு 50 சென்ட் முதல் €2 வரை செலுத்த வேண்டும்

பெல்ஜியத்தில் பயணிகள் செலுத்த வேண்டிய மறைக்கப்பட்ட சுற்றுலா வரி குறித்து கவனமாக இருங்கள். Bruges, Antwerp, Brussels போன்ற இடங்களில் ஹோட்டல் அல்லது அறையின் தரத்தை பொறுத்து வேறுபட்ட கட்டணங்கள் வசூலிக்கப்படுகின்றன.

செப்டம்பர் 23, 2022 அன்று பூட்டான் தனது அனைத்து சுற்றுலா கதவுகளையும் மீண்டும் திறந்தது. அதோடு சேர்த்து பயணிகளின் எண்ணிக்கையை கட்டுப்படுத்த பயணிகளுக்கு ஒரு நாளைக்கு US $200 என்ற நிலையான மேம்பாட்டுக் கட்டணத்தையும் விதித்தது. இது வழிகாட்டிகள், தங்குமிடம் மற்றும் பிற சேவைகளின் செலவுகளுக்கு கூடுதலாக இருக்கும். இந்தியர்களுக்கு ஒரு நாளுக்கு ரூ.1200 வரியாக செலுத்தவேண்டும்.

நியூசிலாந்து 2019 இல் சுற்றுலா வரியை அங்கீகரித்துள்ளது. நியூசிலாந்திற்கு வரும் சுற்றுலாப் பயணிகள் சில விதிவிலக்குகளுடன் 35 நியூசிலாந்து டாலர்களை செலுத்த வேண்டும். அதாவது இந்திய ரூபாயில் 1797 கட்டணமாக செலுத்தவேண்டும்.

பல்கேரியா நாட்டிற்கு செல்லும் ஒவ்வொரு பயணியும் தான்  தங்கும் ஒவ்வொரு நாளுக்கும் 1.50 ஐரோப்பிய டாலர்கள், அதாவது இந்திய மதிப்பில் ரூ.133 செலுத்தவேண்டும்.

தென்கிழக்கு ஐரோப்பில் உள்ள கடற்கரை நாடான க்ரோஷியா (croatia) நாட்டில் தங்குவதற்கு ஒரு நாளைக்கு ரூ. 118 கட்டணமாக செலுத்தவேண்டும்

இந்தோனேஷியா , பாலி செல்லும் பயணிகள் எல்லோரும் அங்கு ஒரு நாள் தங்குவதற்கு அதிகபட்சமாக 802 இந்திய ரூபாய்கள் கட்டணமாக செலுத்தவேண்டும்.

ஜப்பானில், அவர்கள் அதை புறப்படும் வரி என்று அழைக்கிறார்கள். புறப்படும் போது நீங்கள் 1000 யென் (INR 621) செலுத்த வேண்டும்.

நீங்கள் சுவிட்சர்லாந்தில் 40 நாட்களுக்கும் குறைவாகத் தங்குவதாக இருந்தால், நீங்கள் பயணிகளுக்கான வரியைச் செலுத்த வேண்டியிருக்கும். மேலும் இது தங்குமிடக் கட்டணத்தில் சேர்க்கப்படாது.