18, 19-ம் நூற்றாண்டுகளிலேயே உலகை சுற்றிவந்த பெண்கள்... வரலாற்று கதை தெரியுமா?

மார்ச் மாதம் தொடங்கிவிட்டால் அது மகளிருக்கான மாதமாக மாறிவிடும். நான்கு சுவருக்குள் இருந்து பெண்களை வெளியே கொண்டு வர வேண்டும் என்று பல தலைவர்கள் ரொம்ப காலமாக முயற்சி செய்து வருகின்றனர். எல்லா துறைகளிலும் ஆண்களுக்கு பெண்கள் சளைத்தவர்கள் இல்லை என்று சொல்லும் அளவுக்கு நிலை மாறிவிட்டது. ஆனால் இது புதிதல்ல.. பயண துறையில் 18 ஆம் நூற்றாண்டில் இருந்து சாதித்த பெண்களைப் பற்றி தெரிந்துகொள்வோம்.

உலகை சுற்றி வந்த முதல் பெண் என்ற பெருமையைப் பெற்று வரலாற்றுப் புத்தகத்தில் இடம்பிடித்தவர், ஜீன் பரெட்(Jeanne Baret) (1740 - 1807). 1740-ல் பிரான்சில் பிறந்த ஜீன் பரேட், செவிலியராக இருந்தார். 1765 ஆம் ஆண்டில் , லூயிஸ் அன்டோயின் டி பூகெய்ன்வில்லின் உலகச் சுற்றுப் பயணத்தில் சேர ஜீன் பரெட் அழைக்கப்பட்டார். அந்த நேரத்தில் பெண் பயணிகள் பிரெஞ்சு கடற்படை கப்பல்களில் அனுமதிக்கப்படவில்லை. அதனால் செவிலியரான பரேட் ஆண் வேடமிட்டு உலகை சுத்தி வந்துள்ளார்.

1875 இல் பிறந்த ஹாரியட் சால்மர்ஸ் ஆடம்ஸ் (Harriet Chalmer Adams)ஒரு அமெரிக்க ஆய்வாளர், எழுத்தாளர் மற்றும் புகைப்படக் கலைஞர். அவர் தனது வாழ்நாளில் 1,00,000 மைல்களுக்கு மேல் பயணித்துள்ளார். 29 வயதில், அவர் அவரது கணவருடன் முதல் பெரிய பயணத்தை மேற்கொண்டார். மூன்று வருட காலத்தில் தென் அமெரிக்காவில் உள்ள ஒவ்வொரு நாட்டிற்கும் பயணித்துள்ளனர். கிறிஸ்டோபர் கொலம்பஸின் அடிச்சுவடுகளைப் பின்பற்றி கரீபியன் தீவுகளை ஆராய்ந்துள்ளார்.

பிரிட்டிஸ் எழுத்தாளர், தொல்பொருள் ஆய்வாளர் மற்றும் அரசியல் அதிகாரியான கெர்ட்ரூட் பெல் (Gertrude Bell) அரேபியா மக்கள், மொழிகள் மற்றும் வரலாற்றின் மீது ஒரு ஆர்வத்தை வளர்த்துக் கொண்டார். மேலும் பெர்சியா, சிரியா மற்றும் மெசபடோமியா உள்ளிட்ட இடங்களுக்கு பயணம் செய்துள்ளார். முதல் உலகப் போரின் போது, ​​கெய்ரோவில் உள்ள பிரிட்டிஷ் உளவுத்துறை சேவையால் பணியமர்த்தப்பட்டார். போரின் முடிவில், இன்றைய நவீன ஈராக்கை நிறுவுவதில் பெல் முக்கிய பங்கு வகித்தார்.

19 ஆம் நூற்றாண்டைச் சேர்ந்த ஆங்கிலேய ஆய்வாளர் இசபெல்லா பார்ட்(Isabella Bird) உடல்நலக்குறைவு இருந்தபோதிலும், அமெரிக்கா, ஆஸ்திரேலியா மற்றும் ஹவாய் ஆகிய நாடுகளில் உள்ள மலைகளில் ஏறி 800 மைல்களுக்கு மேல் குதிரையில் சவாரி செய்தார். அவரது பயணங்கள் சீனா, ஜப்பான் மற்றும் மலேசியா உட்பட ஆசியாவின் பெரும் பகுதிகளை உள்ளடக்கியது. அன்றைய சீனாவின் வாழ்க்கையை அழகாக படம்பிடித்த புகைப்பட பத்திரிகையாளர் என்றும், நவம்பர் 1892 இல், அவர் ராயல் புவியியல் சங்கத்தில் சேர்க்கப்பட்ட முதல் பெண்மணி என்ற பாராட்டையும் பெற்றார்.

அமெரிக்க பத்திரிகையாளர் நெல்லி பிளை(Nellie Bly) மிகவும் பிரபலமான பெண் பயணிகளில் ஒருவர். ஃபிலியாஸ் ஃபோக்கின் கற்பனைக் கதையால் ஈர்க்கப்பட்ட அவர், நவம்பர் 1889 இல் தனது 24,899 மைல் பயணத்தைத் தொடங்கினார். இங்கிலாந்து, பிரான்ஸ், எகிப்து, பசிபிக் மற்றும் அமெரிக்கா முழுவது 72 நாட்களில் சுற்றுப்பயணம் செய்து சாதனை படைத்தவர். இதற்காக நீராவி கப்பல், ரயில், குதிரை, ரிக்ஷா, சாம்பன் மற்றும் அனைத்து விதமான உள்ளூர் வாகனங்களிலும் பயணம் செய்தார்.

லேடி ஹே டிரம்மண்ட்-ஹே( Lady Hay Drummond-Hay) விமானத்தில் உலகம் முழுவதும் பயணம் செய்த முதல் பெண்மணி ஆவார் . பத்திரிகை நிறுவனத்தில் பணிபுரிந்த இவர் 1928 இல் தனது முதல் செப்பெலின் (zeppelin) விமானத்தில்  5 ஆண் நிருபர்களுடன் பயணத்தை மேற்கொண்டார். பயணத்தில் இருந்த ஒரே பெண் என்பதால் அப்போது தலைப்பு செய்தியாகவே இது மாறியது. பின்னர் சீனாவிலும் எத்தியோப்பியா உள்ளிட்ட போர் மண்டலங்களிலும் வெளிநாட்டு நிருபராக பணியாற்றினார். இரண்டாம் உலகப் போரின்போது பிலிப்பைன்ஸில் உள்ள ஜப்பானிய முகாமில் அடைக்கப்பட்டார்.

பயணம் செய்வதற்கு எந்த வழியிலும் போகலாம் என்று உலகத்திற்கு காட்டியவர் அன்னி லண்டன்டெரி.(Annie Londonderry) 1895 ஆம் ஆண்டில், உலகை சுற்ற சைக்கிள் ஓட்டிய முதல் பெண்மணி ஆனார். சுவாரசியமான செய்தி என்னவென்றால், அவள் வட அமெரிக்கா, ஐரோப்பா மற்றும் ஆசியா முழுவதும் ஒரு பயணத்தைத் தொடங்குவதற்கு முன்பு அவள் சைக்கிள் ஓட்டியதில்லை. பாஸ்டன் தொழிலதிபர்கள் 15 மாதங்களில் எந்தப் பெண்ணும் சைக்கிள் மூலம் உலகைச் சுற்றி வந்து $5,000 சம்பாதிக்க முடியாது என்று அவர்கள் பந்தயம் கட்டிதை பொய் என்று காட்ட அவர் தனது கணவர் மற்றும் மூன்று குழந்தைகளை விட்டு 15 மாதங்கள் சாலையில் கழித்தார்.

அமெரிக்கன் எக்ஸ்ப்ளோரரான ஃபேன்னி புல்லாக் வர்க்மேன்(Fanny Bullock Workman) முதல் பெண் தொழில்முறை மலையேறுபவர்களில் ஒருவர். அவர் பல உயரம் எட்டும் பெண்களுக்கான பிரிவு சாதனைகளை படைத்தார். செல்வத்தைப் பயன்படுத்தி தனது பணக்கார கணவருடன் உலகம் முழுவதும் பயணம் செய்தார். அவரது ஓய்வுக்குப் பிறகு அவர்கள் சைக்கிள் மூலம் ஐரோப்பாவை ஆராயத் தொடங்கினர், அவர்களின் சாகசங்களைப் பற்றி புத்தகங்களை எழுதினார்கள். அவர்களின் இந்தியாவின் மேற்கு இமயமலையில் பயணம் முடிவடைந்தது.

தொல்லியல் வரலாற்றில் முதல் நவீன அகழ்வாராய்ச்சியை மேற்கொண்ட பிரிட்டிஷ் சமூகவாதியும் சாகசக்காரருமான லேடி ஹெஸ்டர் ஸ்டான்ஹோப்.(Lady Hestor Stanhope) நவீன கால இஸ்ரேலின் கரையோரத்தில் புதையல் இடிபாடுகளுக்கு அடியில் புதைந்திருப்பதாகக் கூறும் ஒரு இடைக்கால இத்தாலிய கையெழுத்துப் பிரதியுடன் கிளம்பிய அவரது பயணங்கள் சிரியாவில் ஒட்டோமான் பேரரசு பற்றி ஆராயத் தொடங்கினர். ஒரு கப்பல் விபத்தில் அவள் உடைமைகளை இழந்தபோது அவள் ஆண்களின் ஆடைகளை அணிய ஆரம்பித்தாள். அப்பாடிஏ உலகம் முழுக்க சுத்தினால்.

இன்றைய கால பயணிகளின் முன்னோடியாக இருக்கும் சாரா மார்க்விஸ்,Sarah Marquis) (  1972 இல் பிறந்த சுவிஸ் பயணி 2010 மற்றும் 2013 க்கு இடையில் ரஷ்யாவிலிருந்து ஆஸ்திரேலியாவுக்கு தனியாக நடந்தே பயணித்துள்ளார். சைபீரியா, ஆசியா வழியாக , நுல்லார்போர் சமவெளி(Nullarbor Plain.)  முழுவதும் நடந்தாள். போதைப்பொருள் கடத்தல்காரர்கள் மற்றும் வெப்பமண்டல நோய்கள் எல்லாவற்றையும் தாண்டி மொத்தம் 10,000 மைல்களை பயணித்துள்ளார். நேஷனல் ஜியோகிராஃபிக் அவரை 2014 ஆம் ஆண்டின் அட்வென்ச்சர்ஸ் ஆஃப் தி இயர் என்று தேர்ந்தெடுக்கப்பட்டார்.